🔴О.Батнайрамдал: Хянан шалгах хороог дахин байгуулахгүйн тулд илүү харилцан ашигтай түншлэл байгуулах хэрэгтэй

Оюутолгойн Хянан шалгах түр хорооны сүүлийн хурлаар УИХ-ын тогтоолын төслөө эцэслэж, чуулганаар хэлэлцүүлэхээр болов. Энэ талаар тус түр хорооны дарга О.Батнайрамдал мэдээлэл өглөө.

УИХ-ын гишүүн, Оюутолгойн Хянан шалгах түр хорооны дарга О.Батнайрамдал:

-Хянан шалгах түр хороо хуралдаж, тогтоолын төслөө эцэслээд, УИХ-ын чуулганд оруулсана.

Үүнд, хэд хэдэн нэмэлт заалт орж ирсэн. Жишээ нь, Оюутолгой компаниас борлуулалтын орлогоо Монгол Улсын Төв банк болон арилжааны банкнуудаар 100 хувь дамжуулдаг болох заалт. Мөн Оюутолгойн сүүлийн 16 жилийн үйл ажиллагаанд хамаарах гэмт хэрэг, зөрчлийн шинжтэй асуудлуудыг Монгол Улсын ЕПГ, АТГ, ТЕГ, ЦЕГ зэрэг холбогдох байгууллагуудад зөвлөсөн, хариуцлагатай холбоотой нэг заалт нэмэгдсэн.

Түүнчлэн 53 хувийн өгөөжийг илүү тодорхой болгож оруулсан. Энэ бол 2009 оны хөрөнгө оруулалтын гэрээнд дурдагдсан, 2010 онд батлагдсан ТЭЗҮ-ийн үндэслэл дээрх "Нэрлэсэн үнээр 53 хувийн өгөөж" гэсэн агуулгыг засаж сайжруулсан юм.

Цаашид Оюутолгой төсөл Монголын хамгийн том төслүүдийн нэг хэвээр үлдэнэ. Дахин Хянан шалгах хороо байгуулахгүй байхын тулд илүү харилцан ашигтай, тэгш, урт хугацааны түншлэлийн хэлбэрээр нээлттэй явбал зохино. Энэ шинэ эринийг эхлүүлэх Оюутолгойн тогтоол батлагдана гэж найдаж байна.

Сонсголын явцад зарим талаар бодсоноос илүү үр дүнд хүрсэн гэж бодож байна. 22 тэрбум ам.долларын том бүтээн байгуулалт алдаа оноотой ч, цааш сайжруулаад явах ёстой. Энэ бол бидний үеийн үүрэг. Өмнөх үеийн шийдвэр гаргагчид ч бидэнд дэмжлэг үзүүлэх хэрэгтэй. Оюутолгой төсөл дараагийн 20-30 жилд ч ач холбогдолтой хэвээр үлдэнэ. Ирээдүйд иргэдийн эрх, үүргийг Үндсэн хуулиар хангаж, түүхэн үүргээ гүйцэтгэх ёстой. Бид үүнийг л хийсэн гэж бодож байна.

Гэхдээ УИХ-ын тогтоол батлагдаад, хэрэгжих ёстой. Өмнөх 92, 103 дугаар тогтоолуудын хэрэгжилт хангалтгүй байсан. Сүүлийн 30 жилд олон хууль баталсан ч хэрэгжилт сул, парламентын хяналтын механизм муу ажиллаж ирсэн.

Зээлийн хүүг бууруулах хэлэлцээр идэвхтэй өрнөж, Засгийн газар тооцооллоо хийж байгаа байх. Олон улсын жишигт нийцүүлээд хүүг бууруулах бүрэн боломжтой. Харилцан ашигтай зарчмыг баримтлах ёстой. Монгол Улсын хууль тогтоомжийн дагуу урт хугацааны хамтрагч байх хэрэгтэй гэв.