Шатахууны нийлүүлэлтийг 2026 оны 1 дүгээр сард хоёр дахин нэмэгдүүлнэ

Худалдаа, эдийн засаг, шинжлэх ухаан, технологийн хамтын ажиллагааны Монгол, Оросын Засгийн газар хоорондын комиссын 27 дугаар хуралдаан өчигдөр Улаанбаатар хотноо зохион байгуулагджээ. 

Монгол Улсын Шадар сайд, Засгийн газар хоорондын комиссын Монголын хэсгийн дарга Х.Ганхуяг, ОХУ-ын Байгалийн нөөц, экологийн сайд, Засгийн газар хоорондын комиссын Оросын хэсгийн дарга А.А.Козлов нар хуралдааныг тэргүүлж худалдаа, эдийн засаг, аж үйлдвэр гээд олон чиглэлд зөвлөлдөж бодит үр дүнд хүрлээ. 

Засгийн газар хоорондын комиссын ээлжит хуралдааны үр дүнд Монгол, Оросын Засгийн газар хоорондын комиссын Оросын талын дарга А.А.Козлов "Шатахууны нийлүүлэлтийн асуудлыг дээд түвшний яриа хэлэлцээрийн үeэр ярьж тохиролцсон. Гэхдээ бодит байдал дээр хэрэгжилт асуудалтай байгааг ойлголоо. Комиссын хурал дуусгаад буцаж очмогц ЭХЯ болон нийлүүлэгч аж ахуйн нэгжүүдтэй уулзаж асуудлыг ярилцан шуурхай арга хэмжээ авна" гэж мэдэгдлээ.

Мөн тэрээр 2026 оны 1 дүгээр сард нийлүүлэлтийг хоёр дахин нэмэгдүүлнэ хэмээн амласан байна.