Мансууруулах бодис гэртээ бэлтгэж байсан болон Туркээс нийлүүлэгч залуусыг баривчлав

Г.Уянгасайхан гэх эр Турк улсаас нэг бус төрлийн мансууруулах бодис Монгол Улс руу ачаа тээшинд нуун нэвтрүүлж, түүнийг эх оронд нь хүмүүс хүлээн авч борлуулдаг байж. Цагдаагийнхан түүнийг Интерполын шугамаар эрэн сурвалжилсны үр дүнд Туркээс гараад ОХУ, Казахстанаар дамжин Киргизстан улсад очсоныг Олон улсын эрүүгийн цагдаагийн байгууллагынхан тогтоон баривчилсан аж. Түүнийг хэдий хэмжээний мансууруулах бодис хилээр нэвтрүүлж борлуулсныг нарийвчлан тогтоохоор Хар тамхитай тэмцэх газрынхан үргэлжлүүлэн шалгаж байна.

Мөн Д.Энхтүвшин хэмээх залууг Хан-Уул дүүргийн нутаг дахь орон сууцын нэгэн хороололд байхад нь баривчлан цагдан хорьжээ. Тэрбээр мансууруулах эм, сэтгэцэд нөлөөт бодисыг хууль бусаар ашигласан гэмт хэрэгт шалгуулж байхдаа мөрдөн байцаалтаас оргосон нэгэн гэнэ. Түүнийг амьдарч буй байрнаас нь баривчлах үед гэртээ мансууруулах төрлийн ургамал тарьж бэлтгэсэн байсныг илрүүлэн эд мөрийн баримт болгон хурааж авсан гэх мэдээллийг эх сурвалжууд бидэнд өглөө. Д.Энхтүвшин нь 2015 оноос хойш хулгай, дээрмийн хэрэгт гурав, мансууруулах бодистой холбоотой хэрэгт нэг гээд нийт дөрвөн удаа ял шийтгүүлж байсан аж. Түүнийг баривчлах үед биологийн дээж авч шинжлэхэд хар тамхи хэрэглэсэн нь тодорхой болсон байна.

Энэ төрлийн гэмт хэрэгт холбогдогчид Эрүүгийн хуульд заасан өмчлөх эрхийн эсрэг, хүний эрүүл мэнд болон бэлгийн эрх чөлөө, халдашгүй байдлын эсрэг зэрэг бусад төрлийн гэмт хэрэгт урьд нь ял шийтгүүлж байсан нь анхаарал татаж байна. Өөрөөр хэлбэл, мансууруулах эм, сэтгэцэд нөлөөт бодис худалдан авч хэрэглэх, хадгалах, бусдад зарж борлуулах үйлдэлдээ санхүүгийн эх үүсвэр бий болгох хэрэгцээ шаардлагаар өөр хэрэг үйлдэж байгаа нь тодорхой болсон тул хууль тогтоох, хэрэгжүүлэх байгууллагууд үүнд анхаарах шаардлагатай болжээ.