🔴С.Бямбацогт: УИХ, Засгийн газар аль аль нь ажлаа хийх ёстой. Төсвийг хэлэлцэх эсэх нь УИХ-ын бүрэн эрх

Ирэх 2026 оны төсвийн тухай хуулийг парламентаар хэлэлцэж эхэлсэн ч МАН-ын даргын өрсөлдөөний асуудлаас үүдэн УИХ дахь Ардчилсан намын ихэнх гишүүн чуулганы хуралдааныг орхин гараад байгаа билээ. Үүнээс улбаалж төрийн ажил гацаанд орлоо гэх мэдээлэл гарсан. Уг асуудлаар УИХ-ын гишүүн, ЗГХЭГ-ын дарга С.Бямбацогтоос мэдээлэл авлаа.

УИХ-ын гишүүн, ЗГХЭГ-ын дарга С.Бямбацогт: 

-Төрийн ажил тасралтгүй үргэлжлэх ёстой. Хууль тогтоох дээд байгууллага нь УИХ. Харин Засгийн газар хууль хэрэгжүүлдэг. Аль аль нь ажлаа хийх ёстой. УИХ-д Засгийн газар төсөв өргөн барьсан. Төсвийг хэлэлцэх эсэх нь УИХ-ын бүрэн эрх. Төсвийн тухай хуулийг дэмжихгүй буцаая гэвэл Засгийн газар дахиж боловсруулах нөхцөл байдал үүснэ. Ийм л зохицуулалттай.

Ерөнхий сайд Үндсэн хуульд заасан бүрэн эрхийнхээ хүрээнд ХЗДХ-ийн сайдыг чөлөөлөх, томилох саналаа оруулж ирсэн. Ерөнхийлөгч, УИХ-д танилцуулж Ерөнхий сайд өөрөө томилдог. 2025.09.30-ны өдөр Г.Занданшатар сайд Б.Энхбаяр гишүүнийг ХЗДХ-ийн сайдаар томилох танилцуулгаа Ерөнхийлөгчид оруулсан. Өчигдөр /2025.10.01/ УИХ-д танилцуулах бичгээ хүргүүлсэн. Өнөөдөр /2025.10.02/ хэлэлцээд яаралтай шийдэж өгөөч гэсэн хүсэлт өгсөн ч харамсалтай нь УИХ хэлэлцсэнгүй. ХЗДХ-ийн сайд, Засгийн газрын гишүүнийг яаралтай парламентад танилцуулж, Ерөнхий сайдыг бүрэн эрхээ хэрэгжүүлэхэд нь УИХ санаачилгатай ажиллаасай гэж хүсэж байна. Сайдын асуудлыг УИХ-д зөвхөн танилцуулна, шийдвэр гарахгүй. Танилцах товоо өгчихвөл сайд үүрэгт ажлаа хийх боломж бүрдэнэ гэв.