🔴 М.Энхцэцэг: Б.Энхбаярыг МАН-ын даргын төлөөх өрсөлдөөнд ашиглаж байна

Ерөнхий сайд Г.Занданшатар: Би Үндсэн хуульд заасан онцгой бүрэн эрхийнхээ дагуу УИХ-ын гишүүн Б.Энхбаярыг Хууль зүй дотоод хэргийн сайдаар томиллоо. Нүүрсний хулгайтай тэмцлээ илүү эрх хүчтэй, эрс шийдэмгий хийхийн тулд ийм шийдвэр гаргалаа" хэмээн өчигдөр /2025.09.30/ мэдэгдсэн билээ.

Тэгвэл Ерөнхий сайдын гэнэт гаргасан энэхүү шийдвэр Үндсэн хууль болоод Монгол улсын Засгийн газрын тухай хуулийн холбогдох зүйл заалтуудыг зөрчсөн үү. Уг асуудлаар УИХ-ын гишүүн М.Энхцэцэгээс тодрууллаа.

УИХ-ын гишүүн М.Энхцэцэг:

-МАН бага хурлаараа намын даргаа сонгохдоо нийгэмд болж буй үйл явдал, цаашид гарч болох эрсдэлээ тооцоод тухайн өдөртөө асуудлаа шийдье гэж шийдсэн. Дотроо ярилцаад журмаа баталсан. Зөв алхам гэж би үзэж байна. Энэ бага хурлын нэг эерэг тал нь ил тод, нээлттэй, ардчилсан болсон. Хоёр нэр дэвшигч энэ намыг цааш яаж авч явах вэ гэдэг бодлого, төлөвлөгөөгөө танилцуулсан. Гишүүд анхааралтай сонсож, асуулт асуусан. Эцэст нь, өөрсдийн сонголтоо хийсэн. Энэ бол улс орны хувь заяа шүү дээ. МАН сайн бэлтгэгдсэн боловсон хүчин ихтэйгээ харуулсан. 

Бага хурлын үеэр олон гишүүн Б.Энхбаяр гишүүнийг маш их шүүмжилсэн. Баримт нотолгоогүй байж журмын нөхрөө гүтгэлээ, намын нэр хүндийг унагалаа гэх мэт. Өчигдөр Ерөнхий сайдын мэдэгдлийг харлаа. Хэнд ч ойлгомжтой шүү дээ. Одоо байгаа ХЗДХ-ийн сайд нь яачихсан юм бэ? Тэр хүний огцрох үндэслэл тодорхой байх ёстой. Хоёрдугаарт, маш ноцтой мэдэгдэл хийсэн хүнийг гэнэт сайдаар томилж байгаа нь нэг талаас МАН-ын даргын төлөөх өрсөлдөөнд ашиглаж байгаа мэт мэдрэмж төрсөн. Буруу алхам гэв.