АН: МАН-ын дотоод сонгууль улс төр, нийгмийн тогтвортой байдалд ноцтой заналхийлэл бий болгож байна

Ардчилсан намаас мэдэгдэл гаргалаа.

Монгол ардын нам намын даргаа сонгох сонгуулийг маргааш явуулах гэж буй. Энэхүү сонгууль нь "Улс төр, нийгмийн тогтвортой байдалд ноцтой заналхийлэл бий болгож байна" гэж Ардчилсан нам үзэж байна. 

Мэдэгдлийг бүрэн эхээр нь та бүхэнд хүргэе. 

-Сүүлийн гурван сонгуульд УИХ-ын сонгуулиар олонхын суудал авч, арван жил дараалан засаглаж буй эрх баригч МАН-ын даргын дотоод сонгуулиас үүдэн улс төр, нийгмийн тогтвортой байдалд ноцтой заналхийлэл бий болоод байна. Тус намаас төрийн өндөр албан тушаалд нэр дэвшүүлж, томилогдсон хүмүүс хууль, шударга ёсыг үгүйсгэсэн, ардчилсан байгуулалд харш үйлдэл, мэдэгдэл хийж, Монгол Улсад хууль хэрэгжиж байгаа эсэхэд эргэлзээ төрүүлж буй нь олон нийтийн дунд түгшүүр үүсгэж байна.

Хууль сахиулах байгууллагууд шударга ёсыг сахиулах үндсэн үүргээсээ хазайж, улс төрчдийн нөлөөлөлд автсан гэх хардлага газар авч, төрийн эрх мэдэлд хууль бусаар халдах шинжтэй үйлдэл илэрч байгаа нь ардчилсан тогтолцоонд итгэх итгэлийг ганхуулан, нийгмийн дэг журамд ноцтой эрсдэл учрууллаа.

Ардчилсан нам эрх бүхий албан тушаалтнуудад эрх зүйт ёсны зарчим, Үндсэн хууль болон ардчилсан төрийн байгууллын эсрэг аливаа үйл ажиллагааг нэн даруй зогсоохыг шаардаж байна. Мөн МАН-ын дотоод сонгуулийн зөрчлөөс үүдэлтэй хууль, шударга ёстой холбоотой асуудлыг хууль сахиулах байгууллагууд шуурхай шалгаж, олон нийтэд ил тод мэдээлэхийг мэдэгдэж байна.

Ардчилсан намын зүгээс парламент ёсны дархлаа, эрх зүйт төрийн зарчмыг хамгаалан, ардчиллыг бэхжүүлж, засаглалын тэнцвэртэй байдлыг хангах чиглэлээр хууль тогтоомжийн төсөл боловсруулан хэрэгжүүлэхийн төлөө тууштай ажиллах болно. Улс төрийн намын дотоод асуудал Монголын төрийн асуудал болох ёсгүй гэжээ.