Хүүгийн ээж С.Мягмарсүрэн: Зүүн хойд зүгээс эрэгтэй хүн тэврээд гараад ирэх юм шиг совин төрөөд байна

Хөвсгөл аймагт хоёр настай хүү сураггүй алга болсон. Алга болохдоо таван сартай дүүгийн хамт машиндаа үлдсэн гэх ба түүний ээж С.Мягмарсүрэн тус аймгийн хэвлэлд мэдээлэл өгчээ."Хүү минь амьд л байгаа гэх мэдрэмж төрөөд байна. Сэтгэл гарган эрэл хайгуулд оролцож буй хүн бүрд, Монголчууддаа баярлалаа. Зүүн хойд зүгээс эрэгтэй хүн тэврээд гараад ирэх юм шиг совин төрөөд байна, миний хүү ээждээ олдоноо" гэж хүүгийн ээж С.Мягмарсүрэн хэллээ.

Хүүгийн ээж С.Мягмарсүрэн:

-Манай гэр бүл Тариалан суманд ирээд дөрөв дэх жилдээ өвөлжих гэж байна.Мод бэлтгэхээр саахалт айлынхантайгаа ирсэн. Хоёр хүүхэд маань доороос өгсөж ирэхдээ унтаж байсан.  Хүүхдүүдээ үлдээгээд шуудай авахаар 200 гаруй метрт байсан түлээ ачсан машин руугаа явсан. Тэгээд өгсөөд ирэхэд л хүүхэд минь байгаагүй. Хамгийн удаандаа 20 минут л болсон. Тэгээд л бид өөрсдөө хайж эхэлсэн. Ойр орчимдоо орилж хашгирч хайсан. Тэгээд л хамгийн түрүүнд хадам эгч рүүгээ яриад л хүмүүст хэл дуулгасан. Тэр өдрөөс хойш ямар ч сураггүй байгаад байна. Ямар ч ул мөр хувцас нь олдохгүй байна. Надад амьд л байгаа гэх мэдрэмж төрөөд байна.     

Жолоочийн хойд талаараа буусан байх. Дүүгээ орхиж огт машинаасаа буудаггүй байсан юм. Шээс нь хүрээд уйлсан байж магадгүй. Хойд цонхууд хаалттай, хүү минь дүүгээ орхиж огт явдаггүй байсан.  Одоо хүртэл ямар ч сураг гарахгүй байгаад гайхаж байна. Хүү минь маш сайн ярьдаг. Хөл чангатай.

Сэтгэл гарган эрэл хайгуулд оролцож буй хүн бүрд, Монголчууддаа баярлалаа. Зүүн хойд зүгээс эрэгтэй хүн тэврээд гараад ирэх юм шиг совин төрөөд байна, миний хүү ээждээ олдоно оо гэв.