“Монгол, Хятадын найрамдлын цэцэрлэг” нээлтээ хийв

Монгол, Хятадын Найрамдлын Нийгэмлэгийн санаачилгаар, БНХАУ-аас Монгол Улсад суугаа Элчин Сайдын Яам, Үндэсний олон нийтийн цэцэрлэгт хүрээлэнгийн дэмжлэгээр бүтээн байгуулж тохижуулсан “Монгол, Хятадын найрамдлын цэцэрлэг” нээлтийн ёслолоо хийв. 

Найрамдлын цэцэрлэг нь Монгол Улсын Ерөнхийлөгч У.Хүрэлсүхийн санаачилгаар хэрэгжиж буй "Тэрбум Мод Үндэсний Хөдөлгөөн”-ий эрхэм зорилгод нийцүүлсэн ногоон(эко) бүтээн байгуулалт гэдгээрээ онцлогтой. Цэцэрлэг нийт 3600 м.кв талбайн 60 хувьд буюу 2160 м.кв талбайд төрөл бүрийн мод, бутлаг ургамал, цэцэг, зүлэг тарьж эх байгалийн бичил орчин бүрдүүлсэн.

Мөн хоёр орны ард түмний найрамдал, хамтын ажиллагааны бэлгэдэл  Мазаалай, панда (хулсны баавгай)-гийн гантиг чулуун баримал бүтээн босгож суурилуулжээ. Энэхүү бүтээлийг Монголын чулуун урлал, сийлбэрийн нэртэй мастер, СТА Жамбалын Түвшинжаргал урлажээ. Гантиг чулуунд мөнхөрсөн энэ хоёр бамбарууш нь хөрш хоёр орны мөнхийн найрамдлын бэлгэдэл болон оршино. Үүнээс гадна хөрш хоёр орны найрамдалт харилцааны түүх, хөгжил, ололт амжилтын тухай дурсгалын самбарууд бүтээж толилуулсан нь өргөн олон нийт, хүүхэд залуусын хувьд сонирхолтой бөгөөд танин мэдэхүйн ач холбогдолтой юм.  

МОНГОЛ, ХЯТАДЫН НАЙРАМДЛЫН НИЙГЭМЛЭГ