С.Бямбацогт: Төрийн өмчит компанийн захирлуудын өндөр цалинг тогтмолжуулж, УИХ-ын гишүүн, сайдуудын цалинтай дүйцүүлнэ

Ерөнхий сайд Г.Занданшатар өнөөдөр танхимын сайд нартайгаа хамт Монгол Улсын 2026 оны нэгдсэн төсвийн төслийг танилцуулсан. Энэ үеэр ЗГХЭГ-ын дарга С.Бямбацогт дараах мэдээллийг өгөв.

ЗГХЭГ-ын дарга С.Бямбацогт:

- Эрдэнэс Тавантолгой компанид онцгой дэглэм тогтоож БЭТ томилсноор сард 1.7 сая тонн нүүрс борлуулдаг байсан бол одоо 2.7 сая тоннд хүрсэн. Тээвэрлэлтийн хэмжээ 400 мянган тонноос 600 мянган тонн болж өссөн. Экспорт 1.2 дахин нэмэгдэж, сарын дундаж орлого 120 сая ам.доллараас 150 сая ам.доллар болсон. Мөн олборлолт 2.3 сая тонноос 2.6 сая тонн болсон. Төрийн өмчит компани дээр шахааны бизнес хийж, алдаа гаргасан албан тушаалтнуудад хуулийн байгууллагаар хариуцлага тооцсон.

Түүнчлэн Эрдэнэт үйлдвэрийн дэргэд зэс хайлуулах үйлдвэр байгуулна. Үүнийг шахааны зарчмаар бус, стратегийн хөрөнгө оруулагч болон технологи эзэмшигч компаниудын дунд нээлттэй сонгон шалгаруулалт зарлаж, шалгарсан компанитай хувьцаа эзэмших байдлаар хэрэгжүүлэхээр төлөвлөж байна. Дарханы төмөрлөгийн үйлдвэрт тулгуурласан ган боловсруулах үйлдвэрийг мөн ижил зарчмаар барина. Одоогийн байдлаар тус үйлдвэр 100 мянган тонны хүчин чадалтай ч 15 мянгыг л хайлуулж байгаа тул үндсэн чиглэлдээ эргэн төвлөрөхийг даалгасан. 

Мөн төрийн өмчит компанийн захирлуудын өндөр цалинг цаашид тогтмолжуулж, УИХ-ын гишүүн, сайдуудын цалинтай дүйцүүлнэ. Үр дүнгээс нь шалтгаалан улирал тутам урамшуулал, нэмэгдэл олгох тогтолцоонд шилжүүлэх ажлыг эхлүүлжээ.

УИХ-ын  238 мянган төрийн албан хаагчийг 218 мянга болгон есөн хувиар цомхотгох шийдвэр гарсан. Энэ ажлыг тэтгэвэрт гарсан, ажлаас халагдсан хүмүүсийн оронд шинэ хүн авахгүйгээр хэрэгжүүлэх бөгөөд ажилтнуудыг хохироохгүй байх зарчим баримтална. Мөн төрийн албан хаагчдын гүйцэтгэлийн үнэлгээг ил тод болгох ажлыг эхлүүлсэн

Go Mongolia, Welcome to Mongolia төсөл хэрэгжүүлэхтэй холбоотой зардлууд "Шилэн данс"-нд харагдахгүй байгаа асуудлыг шалгаж байгаа. Яамдын үйл ажиллагаанд хийсэн аудитын шалгалтаар хэдэн их наядын зөрчил илэрсэн гэж яригдаж байгаа. Үүнд ЗГХЭГ-аас шалгалт хийгээд, удахгүй мэдээлнэ гэв.