Г.Занданшатар: Эх орноороо бахархах, хайрлан дээдлэх сэтгэл зүрхтэй нэгэн байх нь чухал шүү
Монгол Улсын Ерөнхий сайд Г.Занданшатар хичээлийн шинэ жилийг тохиолдуулан ахлах ангийнханд “Илгээлт захидал” хүргүүлжээ.
Эрхэм дүүдээ хичээлийн шинэ жилийн мэнд хүргэе.
Монголчууд аргалын галаас дулааны эрчим хүчний үйлдвэрт, дэнгийн гэрлээс өндөр хүчдэлийн цахилгаан гэрэлд, жингийн цуваанаас галт тэрэгний тээвэрт, морин өртөөнөөс моторт хөлөгт, модон сампингаас цахим тооцоолуурт, сарлагийн нуруунаас сансрын хөлөгт шилжин дэвшсэн нь "боловсрол"-ын үр өгөөж тул эрдэмд шимтэн суралцаж буй есдүгээр ангийн суралцагч чи ч үүнтэй мөн адилаар өөрийн олж авсан мэдлэг, чадвараа ашиглан, эх орон дэлхий дахинд өөрийн хувь нэмрийг оруулах иргэний нэг гэдгийг санаарай.
Дэлхий маш хурдтай хувьсан өөрчлөгдөж байгаа энэ цаг үед хичээлдээ шамдан суралцахаас гадна асуудал шийдвэрлэх, шүүн тунгаах, бусадтай эелдэг харилцах, багаар хамтран ажиллах, эрсдэлийг тооцох, хүлээх, даван туулах, аливаад дасан зохицох зэрэг иргэдийн ирээдүйг шаардлагатай ур чадвартай байх нь маш чухал болсон.
Хиймэл оюун ухаан, дижитал шилжилт, цахим засаглал, их өгөгдлийн үүрэг улам бүр нэмэгдэж, дэлхий нийтээр эдгээрийг төгс эзэмшихийн төлөө тэмүүлж байгааг соргогоор анзаарч, шинэ технологийг хэрэглээ болгож, дэлхийн хүүхдүүдтэй мөр зэрэгцэхийн төлөө шамдан суралцахыг хүсье.
Өсвөр насыг даван туулах сэтгэл зүйн тогтвортой байдлыг бий болгон, өөрийгөө танин мэдэж, бусадтай харилцах, нийгэмд зөв, шударга хүн болохын төлөө гаргаж буй үйлдэл, хандлага, бусдад үзүүлэх хүндэтгэлийг эрхэмлэн, ёс зүйн төлөвшлийг суулгаарай.
Нээлттэй дэлхийн үүд хаалгыг нээх боломжтой энэ цаг үед даяаршилтай хөл нийлүүлэхийн зэрэгцээ монгол үндэстний түүх, соёл, үнэт зүйл бүрийг эрхэмлэн дээдэлж, эх орноороо бахархах, хайрлан дээдлэх сэтгэл зүрхтэй дангааршлаар онцгойрсон нэгэн байх нь чухал шүү.
Ахлах ангид дэвшин суралцахын өмнөх энэ шинэ жилд шинэ итгэл, урам зоригоор жигүүрлэн, амжилттай сайн сурахын ерөөл өргөе.
Монгол Улсын Ерөнхий сайд Г.Занданшатараас
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.