🔴LIVE: Ж.Баярмаа нэрээ татаж, Ардчилсан намын даргын сунгаанд О.Цогтгэрэл ялалт байгууллаа
УИХ дахь Ардчилсан намын бүлгийн дарга О.Цогтгэрэл, Ардчилсан намын даргын сунгаанд ялалт байгууллаа. Тэрээр ҮБХ-ны 314 гишүүнээс 196 санал авсан юм. Нэр дэвшигч Б.Пүрэвдорж, Ж.Баярмаа нар нэрээ татсан. Ардчилсан намын их хурал өнөөдөр болж намын шинэ даргаа батламжлах юм.
Ардчилсан намын ҮБХ-ны эхний санал хураалтаар О.Цогтгэрэл 196, Б.Пүрэвдорж 82, Ж.Баярмаа 33, Б.Отгонбат 3 хүний санал авчээ.
Улмаар нэр дэвшигч Б.Отгонбат хасагдаж, хоёр дахь шатны санал хураалт явагдахаар байв. Гэтэл УИХ-ын гишүүн Б.Пүрэвдорж нэрээ татаж буйгаа зарлалаа. Ингэснээр сүүлийн санал хураалт О.Цогтгэрэл, Ж.Баярмаа нарын дунд явагдахаар байсан. Тэгвэл санал хураалтын өмнө нэр дэвшигч Ж.Баярмаа нэрээ татжээ.
Тэрбээр "Ардчилсан намын даргад эмэгтэй хүн нэр дэвшдэг, өрсөлддөг юм шүү гэдгийг харуулахыг зорилоо. Сонгууль зохион байгуулсан багтаа баярлалаа. Ялалт байгуулсан О.Цогтгэрэлдээ баяр хүргэе. Би нэрээ татлаа. Намайг дэмжсэн 33 хүнд баярлалаа" гэжээ.
Ингэснээр Ардчилсан намын даргын сунгаанд нэг нь хасагдаж, хоёр нь нэрээ татсанаар О.Цогтгэрэл ялалт байгуулж байна. Ардчилсан намын их хурал өнөөдөр болж намын шинэ даргаа батламжлах юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.