Ч.Лодойсамбуу: Ардчилсан нам институт болоод эв нэгдэлтэйгээр сонгуульд орох юм бол ялна

Ардчилсан намын ҮБХ-ны ээлжит бус хурал нэр дэвшигчдийн илтгэлээр үргэлжилж байна. Намын даргын сонгуультай холбогдуулан УИХ-ын гишүүн Ч.Лодойсамбуугаас байр суурийг нь тодруулав. 

УИХ-ын гишүүн Ч.Лодойсамбуу:

-Ардчилсан намын даргад нэр дэвшсэн дөрвөн гишүүн маань өчигдөр Монголчуудынхаа өмнө юу бодож байгаа илэрхийлж мэтгэлцсэн. Манай намын Үндэсний бодлогын хуралдаан өөр байдлаар өнөөдөр хуралдаж байгааг та бүхэн ч гэсэн харж байгаа байх. Одоогийн удирдлагын хичээл зүтгэлийн ачаар ийм үр дүнд хүрсэн гэж үзэж байна. Бүгд нэг тал руу харж хэрүүл маргаангүйгээр намын даргаа сонгоё гэдэг дээр санал нэгдэж байгаа нь сайн хэрэг. Үүнийг манай нам гэхээсээ илүүтэйгээр Монгол Улс хүсэж байна.

Миний хувьд 16 яам, 23 сайд үүнийгээ арав дотор багтаагаад, төрийн данхгар бүтцээ багасгах замаар татвараа бодитоор бууруулна. Нийгмийн даатгалын реформыг хувийн хэвшилтэйгээ хамтраад олон тулгуурт болгоно гэх мэт өөрийн мөрийн хөтөлбөрт байгаа ажлыг хий гэж хэлсний дараа хамтарсан засгийн газарт орох тухай ярьж болох юм. Энэ саналаа нэр дэвшигчдэд бас хэлсэн.

Ардчилсан нам институт болоод эв нэгдэлтэйгээр сонгуульд орох юм бол ялна гэв.