НИТХ-ын дарга А.Баяр түгжрэлийг бууруулах ажлын хүрээнд даатгалын салбарын төлөөллүүдтэй уулзжээ

НИТХ-ын дарга бөгөөд Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн дарга А.Баяр түгжрэлийг бууруулах чиглэлээр захирамж гарган үе шаттай ажлуудыг зохион байгуулж байгаа юм.

Энэ хүрээнд даатгалын салбарын төлөөллүүдтэй өнөөдөр уулзаж хөнгөн хэлбэрийн авто замын осолд замын цагдаа, даатгалын ажилтан ослын газарт очихгүйгээр технологи буюу AI ашиглан хэрхэн шийдэх боломжтой талаар ярилцлаа. Уулзалтад даатгалын салбараас гадна Тээврийн цагдаагийн алба, Замын хөдөлгөөний удирдлагын төв, Санхүүгийн зохицуулах хороо зэрэг холбогдох төрийн албаныхан оролцлоо. Тээврийн цагдаагийн албаны Шуурхай зохицуулалтын хэлтсийн дарга, цагдаагийн хурандаа Ц.Чинзориг авто замын хөдөлгөөнд мөрдөгдөж буй хууль эрх зүйн орчин болон нөхцөл байдлыг танилцуулав.

Нийслэлийн авто замын түгжрэлд хөнгөн хэлбэрийн авто ослын дуудлага ихээхэн нөлөөлдөг байна. Тодруулбал, хоёр машин мөргөлдсөн хөнгөн хэлбэрийн дуудлагад цагдаа дунджаар 40 минутыг зарцуулж ослын газарт очдог бол энэ хугацаанд тус замд үүссэн түгжрэл 2 цаг үргэлжилдэг байна. Тиймээс Жолоочийн даатгалын тухай хуулийн 16.6. Даатгалын тохиолдлын улмаас хүний амь нас, эрүүл мэнд хохироогүй, холбогдогч талуудын тээврийн хэрэгслээс бусад эд хөрөнгийн хохиролгүй, холбогдогч талууд өөр хоорондоо маргаангүй тохиолдолд даатгагч, жолоочийн даатгалын сан нь даатгалын тохиолдлын талаарх мэдээлэл, баримтыг цахимаар даатгуулагч болон Зөрчил шалган шийдвэрлэх тухай хуулийн 1.4 дүгээр зүйлийн 1.6-д заасан автоматжуулсан системээс хүлээн авч, нөхөн төлбөрийг шийдвэрлэнэ гэсэн тус заалтын дагуу цагдаа очихгүй даатгалын компани технологи ашиглан замын түгжрэл үүсгэхгүйгээр түргэн шийдвэрлэхийг талууд ярилцлаа. Дээрх асуудлыг шийдвэрлэснээр хөнгөн хэлбэрийн авто ослын дуудлагад технологи ашиглан 5-10 минут зарцуулах замаар түгжрэл бууруулахыг зорьж байна.

Харин даатгалын компанийн удирдлагууд авто замын ослын зургийг Замын хөдөлгөөний удирдлагын төвөөс авах боломжтой эсэх, авто машины хар хайрцгийн стандартын хэрэгжилтэд холбогдох төрийн байгууллагаас дэмжлэг үзүүлэх, жолооч нарын хариуцлагыг нэмэгдүүлж осол аваар гаргасан тохиолдолд ирэх жилийнх нь онооноос хасах, даатгалын төлбөр дээр нөхөн төлбөр нэмэгддэг байх зэрэг тулгамдсан асуудлууд байгаа талаар танилцууллаа. Улмаар НИТХ-ын дарга А.Баяр холбогдох байгууллагуудыг нэгтгэсэн Ажлын хэсэг байгуулж 7 хоногийн дараа ажлын явцаа танилцуулахыг үүрэгдлээ.