Э.Бат-Амгалан: Барилгын салбар үүсэж хөгжсөний 100 жилийн ой угтаж салбарын хуулиудад өөрчлөлт оруулахаар ажиллаж байна
Хот байгуулалт, барилга, орон сууцжуулалтын яамны сайд Э.Бат-Амгалан барилгын салбар болон нийтийн аж ахуйн төрийн бус байгууллагуудын /ТББ/ төлөөллийг хүлээн авч уулзжээ.
Уулзалтын эхэнд ХББОС-ын сайд Э.Бат-Амгалан “Засгийн газар орон сууцны санхүүжилтийн дагнасан банк байгуулж, зээлийн хүртээмжийг сайжруулах замаар үл хөдлөх салбарын үйлдвэрлэл, ажил эрхлэлтийг дэмжих бодлого баримтлахаар төлөвлөж байгаа” талаар онцлов.
Тэрбээр үргэлжлүүлэн “Барилгын тухай хууль, Хот байгуулалтын тухай хууль, Орон сууцжуулалтын тухай хуульд барилгын норм, нормативын чиглэлээр өөрчлөлт оруулахаар ажлын хэсэг байгуулсан. Тиймээс энэ чиглэлд бид ойртож хамтарч, ажиллах нь зүйтэй. Ирэх 2026 онд барилгын салбар үүсэж хөгжсөний 100 жилийн ой тохионо. Тиймээс 100 жилийн ойг угтаж хүний нүдэнд үзэгдэж, гарт баригдах ажил хийхийг зорьж байна” гэлээ.
Уулзалтын үеэр ТББ-уудын төлөөллийн зүгээс дараах саналуудыг илэрхийлэв.
- Боловсон хүчин дутагдалтай байгаа учир гадаадаас боловсон хүчин авах шаардлагатай. Энэ чиглэлд нарийн тоон судалгааг хийж мэргэжлийн боловсрол сургалтын төвтэй хамтарч ажиллах.
- Салбарын хуулийн реформ хийх.
- Стандартын шаардлага хангахгүй барилгын материалын чиглэлд холбогдох байгууллагуудтай хамтарсан хяналт шалгалт хийх.
- ШУТИС-ийг барилгын материал үйлдвэрлэлийн технологич мэргэжлээр жилд 30 оюутан төгсдөг. Тиймээс ШУТИС-тай хамтарч ажиллаж, элсэгчдийг идэвхжүүлэх.
- Барилгын тухай хуульд хувийн хэвшил болон ТББ-аар гүйцэтгүүлэх 12 нэр төрлийн ажил үйлчилгээг дурдсан байдаг. Үүнээс ТББ-д сургалт, тусгай зөвшөөрөл гэх хоёр ажил хамаарч байна. Цаашид үүнийг нэмэгдүүлэх шаардлагатай.
Уулзалтын төгсгөлд ХББОС-ын сайд Э.Бат-Амгалан ТББ-уудын төлөөллийн зүгээс гаргасан саналыг газрын дарга нарт нэгтгэж ирэх долоо хоногт танилцуулах үүрэг, чиглэл өгчээ. Дээрх уулзалтад барилга угсралт, барилгын материалын үйлдвэрлэл, хот байгуулалт, зураг төсөл, инженер геологийн чиглэл, нийтийн аж ахуйн ТББ-уудын төлөөлөл оролцсон юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.