Б.Пүрэвдорж: 2028 онд Ардчилсан нам ялалт байгуулснаар төрийн нэрээр хулгай хийсэн хүмүүст маш хатуу хариуцлага тооцно

УИХ-ын дэд дарга Б.Пүрэвдорж Ардчилсан намын даргын сонгуульд нэр дэвших хүсэлтээ хүргүүлэв.

УИХ-ын дэд дарга Б.Пүрэвдорж:

-1992 онд Ардчилсан намд элсэж, батлахаа авч, сумандаа ухуулагч хийж эхэлснээс хойш энэ намын төлөө зүтгэх сайхан боломж ирсэн. Улс төрд идэвхтэй оролцох үе бол 2009-2012 онд Ховд аймгийн АН-ын даргаар ажиллаж, Ховд аймагт энэ намыг анх ялалт байгуулах үүдийг нээсэн. ГИХАЭГ, Шилжилт хөдөлгөөний ерөнхий газрын даргаар ажиллаж, Монголчууд өөрсдийнхөө сайхан амьдрах боломжийн төлөө ажиллаж байлаа. 2016 оноос хойш өнөөдрийг хүртэл гурван сонгууль дараалан ялж, ард түмнийхээ хэлж дамжуулсан захиасыг Монгол төрийн хууль, бодлого болгохын төлөө ажиллаж ирсэн.

Өнгөрсөн хугацаанд өнөөдрийн эрх баригчдын аливаа буруу шийдвэртэй байнга тэмцэж ирсэн. Ардчилсан намын даргад нэр дэвшихдээ би гурван зүйлд голлон анхаарч ажиллана. Нэгдүгээрт, Чөлөөт зах зээлийг шинэ шатанд гаргах ажлыг, баруун төвийн үзэл баримтлалаар ажиллана. Өнөөдөр Монгол Улсын эдийн засагт төрийн оролцоо хэтэрхий их болсон. Нийт эдийн засгийн 40% нь төсвөөр дамжиж, 30% нь төрийн өмчит компаниар дамжиж хэрэгжиж байна. 10% нь дарга нарын голцуу, төсвийн хөрөнгөөр ажил хийдэг 5000 компанийн эдийн засаг. Монголын нийт эдийн засгийн 75% нь төсөв, төрийн өмчийн компани, дарга нарын компанитай холбоотой болчхоод байгаа. 25% дээр Монголын эдийн засаг явж байгаа. Иргэдийн амьдрах боломжийг төр авсан. Төвлөрсөн төлөвлөгөөт эдийн засагт шилжсэн орон болчхоод байгаа. Тийм учраас татвар төлөгчдийн мөнгийг үр дүнтэй ашиглах ялангуяа дэлхийн улс орнууд хувийн хэвшлээр дамжиж, хувийн хэвшил рүүгээ, чөлөөт зах зээл рүүгээ дэмжсэн бодлого явуулсан улс орнууд хамгийн үр дүнтэй хөгжиж байгаа. Гэтэл өнөөдөр татвар төлөгчдөөс авч буй татвар төсвөөр дамжин, дарга нарын халаас руу орж, алга болж байгаа. Тиймээс данхар төрийг байхгүй болгох, цомхон болгох ёстой. Төр өнгө орж гялалзах тусам ард иргэдийн амьдрал муудаж, аж ахуйн нэгжийн орлого багасдаг.

Хоёр дахь зүйл бол хариуцлагын асуудал. Есөн жилийн туршид МАН үнэмлэхүй олонхоор засаглахдаа энэ Монгол Улсын ард иргэдийн боломжийг хумьсан. Төсвийн хулгай, ковидын хулгай, нүүрсний хулгай, ногоон автобусны хулгай гээд маш олон хулгайг өнгөрсөн хугацаанд хийсэн. Нүүрсний орлогыг яаж хулгайлж, алга болсныг та бүгд мэдэж байгаа. Бие биендээ хариуцлага тооцохгүй явдаг.

2028 онд Ардчилсан нам ялалт байгуулснаар төрийн нэрээр хулгай хийсэн хүмүүст маш хатуу хариуцлага тооцох болно гэдгээ хэлье. Хулгайн мөнгө мөртэй. Чөлөөт зах зээлийг, үг хэлэх, хэвлэн нийтлэх, улс төрийн, эдийн засгийн эрх чөлөөг бүрэн авчрахын тулд та бүхэнтэй хамтарч Ардчилсан намыг ялуулахын төлөө, хамтарч ажиллах болно гэв.