О.Цогтгэрэл: Ардчилсан нам ялсан шиг ялж, засагласан шиг засаглана

УИХ-ын гишүүн, УИХ дахь АН-ын бүлгийн дарга О.Цогтгэрэл Ардчилсан намын даргын сонгуульд нэр дэвшигчийн материалаа албан ёсоор өгч, мэдээлэл хийв. 

УИХ-ын гишүүн, УИХ дахь АН-ын бүлгийн дарга О.Цогтгэрэл:

-Ардчилсан намын Үндсэн дүрэм болоод Ардчилсан намын даргыг сонгох журмын хүрээнд намын журмын нөхөдтэйгөө ярилцаад Ардчилсан намын даргын сонгуульд албан ёсоор нэрээ дэвшүүлж, сонгууль зохион байгуулах хороонд өргөдөл, мөрийн хөтөлбөрөө танилцуулж байна. Ардчилсан намын даргад өрсөлдөх гэж байгаа хүнд тавигдах болзол шаардлагууд бий. Миний хувьд АН-ын гишүүнээр элсээд 25 жил, АН-ын ҮБХ-ны гишүүнээр сонгогдоод 10 жил, АН-ын УТЗ-ийн гишүүнээр сонгогдоод найман жил болж байна. Мөн сүүлийн хоёр парламент дамжин УИХ дахь АН-ын бүлгийн даргаар ажиллаж байна. Мөн одоогоос 10 жилийн өмнө буюу 2015 онд дунд шатанд буюу аймгийн намын даргаар ажиллаж байсан зэргээр АН-ын бүхий л шатанд нь ажиллаж ирсэн бүтээгдэхүүн гэдгээ тодотгож хэлье.

Ардчилсан намын даргын сонгууль, сунгаанд цаашид Ардчилсан нам төрийн сонгуульд амжилттай оролцохын тулд, төрийн сонгуульд ялсан тохиолдолд цаашид юу хийх юм бэ гэдэг бодлогоо танилцуулах ёстой. Тиймээс “Шинэ Монголоо цуг бүтээнэ” гэдгээ мөрийн хөтөлбөртөө тусгалаа. Монголоо шинээр харах ёстой, Ардчилсан намаа шинэчлэх ёстой. Монгол Улсын хөгжил дэвшлийн өмнө тулгамдаад байгаа хууль эрх зүй, эдийн засаг, улс төрийн гэх мэт бүх салбарт шинэчлэл өөрчлөлт хийх шаардлага байна. Улс орноо шинэ шатанд гаргах шаардлага байна. Үүнийг ганцхан Арчилсан нам хийж чадна. Монгол Улсын өмнө тулгамдсан асар олон асуудал бий. Хүн амны 30 хувь нь буюу 3 хүн тутмын нэг нь ядуу байна. Үлдсэн хоёр хүний нэг нь ядуурлын шугамд ойр байна.

Хүн амын 60-70 хувь нь ядуурлын шугамд ойрхон байгаа ийм улс оронд олон зүйл урвуугаараа эргэж байна. Энэ их ядуурлын цаана ардчилсан тогтолцоо аюултай, эмзэг байдалд байна. Ардчилсан намын олон олон удаагийн ялагдлын шалтгаан ч үүнтэй холбоотой байна. Ардчилсан нам баруун төвийн буюу хувь хүний эрх, эрх чөлөө, хувийн өмчийг дээдэлсэн төрийн бага оролцоог эрхэмлэдэг намын хувьд Ардчилсан нам ялах ёстой ийм цаг үе дээр ирээд байна. Ардчилсан нам ялсан шиг ялж, засагласан шиг засаглах хэрэгцээ шаардлага тулж ирээд байна. 

Ардчилсан нам яагаад ялж, олонх болж чадахгүй байгаа юм. Үүний үндсэн шалтгаан нь Ардчилсан нам улс төрийн систем болж чадахгүй явсных. Манай нам мундаг үзэл санаатай, лидерүүдтэй. Гэсэн ч систем болж чадалгүй явж ирлээ. Тиймд энэ бүхнийг бид шинэчлэн өөрчлөх шаардлагатай. Тиймд бид “Шинэ Монголыг хамтдаа өөрчилнө” шинэчилсэн Ардчилсан нам энэ бүхнийг хийж чадна гэдэгт эргэлзэхгүй байна. Нэр дэвших бүртгэлээ хүлээн авч, мандат өгсний дараа буюу маргаашаас сурталчилгааны ажил эхэлж, мөрийн хөтөлбөрийнхөө талаар дэлгэрэнгүй ярих болно гэв.