Ардчилсан намын даргад нэр дэвшигчдийг өнөөдөр 18.00 цаг хүртэл бүртгэж, 31-нд сонгууль явуулж, батламжилна

Ардчилман намын шинэ даргыг сонгох дотоод сонгуулийн хороог өчигдөр ҮБХ-ны хуралдаанаар байгуулжээ. Тус хорооны даргаар УИХ-ын гишүүн С.Эрдэнэболд сонгогджээ. 

УИХ-ын гишүүн С.Эрдэнэболд:

-Ардчилсан намын даргад нэр дэвшигчдийг өнөөдөр 11.40-18.00 цагийн хооронд бүртгэнэ. Шаардлага хангасан гишүүдэд нэр дэвшигчийн мандатыг өгнө. Харин энэ сарын 31-нд Үндэсний бодлогын хороо үргэлжлүүлэн хуралдаж, намын даргын сонгуулиа явуулахаар тогтож байна. ҮБХ дээр нэр дэвшигчид мөрийн хөтөлбөрөө танилцуулж, өрсөлдөнө. Ялалт байгуулсан нэр дэвшигчийг Их хурлаар батламжилна. Олон нэр дэвшигч гарсан тохиолдолд магадгүй хоёр, гуравдугаар шатны сонгууль явуулж болох дүрэм бий.

Дотоод сонгуулийн хороо нэр бүхий 15 хүний бүрэлдэхүүнтэй ба нууц санал хураалтаар дарга, нарийн бичгээ сонгосон. Бидэнд гашуун туршлага байгаа учир бүгдийг баримтжуулж байгаа. Улс төрийн намын тухай хууль болон УДШ-д бүртгэгдсэн намын дүрмийг үндсэн эх болгож баримтална. Мөн намын даргыг сонгох 2023.01.13-ны өдрийг журмыг баримталж байгаа. Эдгээрийг хангасан ямар ч нэр дэвшигч АН-ын даргад нэр дэвших бүрэн боломжтой гэв.