Ц.Санжаачойпэлийг сулласан шүүгчийн захирамжид прокурор гомдол гаргажээ
УИХ-ын гишүүн асан, “GEM групп”-ийн эзэн, улсын гарди Ц.Цэрэнпунцагийн хүү Санжаачойпэлийг энэ сарын 8-нд Дүүргийн эрүү, иргэний хэргийн хялбар ажиллагааны анхан шатны тойргийн шүүхийн шүүгчийн захирамжаар суллаж, батлан даалтад гаргажээ.
Эрүүл мэндийн шалтгааны улмаас гэсэн үндэслэлээр таслан сэргийлэх арга хэмжээг нь өөрчилсөн гэх албан бус мэдээлэл байгаа юм. Уг захирамжийг гаргасан шүүгч нь өвдсөний улмаас ажилдаа ирээгүй тул тус шүүхээс албан ёсны мэдээлэл өгсөнгүй.
Ц.Санжаачойпэл нь УИХ-ын гишүүн асан, “Эрэл” ХХК-ийг үүсгэн байгуулагч Б.Эрдэнэбатын хүү Тэмүүлэн, “Таван богд групп” ХХК-ийн Ц.Баатарсайханы хүү, “Говь” ХК-ийн гүйцэтгэх захирал Амарсайхан, УБТЗ-д ажиллаж байгаад тэтгэвэртээ гарсан хүний хүү Л.Алтан-Очир нартай хамтарч иргэн Д.С-г долоодугаар сарын 18-19-нд шилжих шөнө зодож хүнд гэмтээсэн хэрэгт холбогдсон юм.
Улмаар Дүүргийн эрүү, иргэний хэргийн хялбар ажиллагааны анхан шатны тойргийн шүүхийн шүүгчийн захирамжаар өнгөрсөн сарын 23-наас хойш цагдан хориод байсан. Гэтэл Ц.Санжаачойпэлийг батлан даалтад гаргасан нь олон нийтийн сүлжээнд иргэдийн дургүйцлийг төрүүлээд байна. Харин түүнд авсан таслан сэргийлэх арга хэмжээг өөрчилсөн захирамжид хэрэгт хяналт тавьж буй Сүхбаатар дүүргийн Прокурорын газрын хяналтын прокурор гомдол гаргасан бөгөөд өчигдөр дээрх шүүх хүлээн авчээ. Гэхдээ хэлэлцэх хугацаагаа товлоогүй өчигдрийг өнгөрөөсөн бөгөөд өнөөдөр хянан шийдвэрлэх аж.
Э.Тэмүүлэн, Ц.Санжаачойпэл, Л.Алтан-Очир нарт Эрүүгийн хуулийн 20.16-1 дэх хэсгийн “Нийтийн хэв журмыг бүлэглэн зөрчиж бусдад хүч хэрэглэж, эсхүл эд хөрөнгө устгаж, гэмтээж, эсхүл эдгээр үйлдэлд өдөөн турхирч, татан оруулж хүний халдашгүй, чөлөөтэй байх, эд хөрөнгө өмчлөх эрхийг зөрчиж, аж ахуйн нэгж, байгууллагын хэвийн үйл ажиллагаа, олон нийтийн амгалан тайван байдлыг алдагдуулсан” гэсэн заалтын дагуу яллагдагчаар тооцоод байсан бол нэмж, тус хуулийн 20.7-1-ийн мансууруулах бодис хууль бусаар олж авсан, 11.1-ийн хүний эрүүл мэндэд хүнд хохирол учруулсан гэх заалтын дагуу яллагдагчаар татах тогтоол танилцуулсан гэсэн мэдээллийг эх сурвалжууд өгөв.
Түүнчлэн “Говь” ХК-ийн гүйцэтгэх захирал Б.Амарсайханыг БНСУ-д байгааг хууль сахиулагчид тогтоосон бөгөөд хилээр орж ирэхэд нь цагдан хорих шүүгчийн захирамж хүчинтэй байгаа гэнэ. Харин хохирогчийн хувьд Солонгосын эмнэлэгт нэлээд хүнд мэс засалд орсон бөгөөд цаашид нэг бус хагалгаа хийлгэх шаардлагатай аж.
Сурталчилгаа
Сэтгэгдэл (2)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.