Төрийн өмчийн бодлого, зохицуулалтын газрын дарга Б.Цэнгэл Засгийн хуралдаанаас гарсан шийдвэрийн талаар дараах мэдээллийг өглөө.

Төрийн өмчийн бодлого, зохицуулалтын газрын дарга Б.Цэнгэл:

-2024-2028 оны үндсэн чиглэлийн төсөлд төрийн өмчит 20 компани багтсан. Эрдэнэт үйлдвэр, Эрдэнэс тавантолгой, Эрчим хүчний 11 компани, Миат, Төрийн банк, Хөдөө аж ахуйн бирж, корпораци зэргээс 10-66 хүртэлх хувийг Монголын болон гадаадын биржээр оруулж, хувьцааг нээлттэй болгох саналыг орууллаа.

Энэ арга хэмжээний үр дүнд 3.74 их наяд төгрөгийн орлого төвлөрүүлэх боломжтой гэж тооцож байна.

17 компани цөөлөх, 9 компанид бүтцийн өөрчлөлт хийх, эрх шилжүүлэн нэгтгэх зэрэг саналуудыг Засгийн газарт танилцуулсан. Ингэснээр одоогийн 109 төрийн өмчит компаниас 87 болгон бууруулах төлөвлөгөөтэй буй.

Төрийн өмчит компаниудын захирлуудын цалингийн шударга бус хуваарилалтын асуудлыг хөндсөн бөгөөд үйл ажиллагааны үр дүн, компанийн ашиг орлогод нийцсэн урамшууллын системийг олон улсын байгууллагуудтай хамтран боловсруулах талаар ярилцаж байна. 

Судалгаагаар хамгийн өндөр цалин авч буй захирлууд нь сарын 30 сая төгрөг хүртэл авдаг. Тодруулбал Эрдэнэс Монгол, Эрдэнэс Тавантолгой, Хөдөө аж ахуйн бирж, МИАТ‑ын захирлуудын цалин салбарын болон бусад төрийн өмчит компаниудынхаас өндөр байна.
Харин Монгол шуудан, Монгол кино нэгдэл, Үндэсний шигшээ багийн бэлтгэл сургуулилтын төвийн захирлуудын цалин 940,000–1,300,000 төгрөг байгаа  гэлээ. 

---