Засгийн газрын ээлжит хуралдаан өнөөдөр болж дараах шийдвэрийг салбарын сайд нар танилцууллаа. Цахим хөгжил, инновац, харилцаа холбооны сайд Н.Батшугар И-баримтыг цахимжуулах талаар дараах мэдээллийг өгөв.

Цахим хөгжил, инновац, харилцаа холбооны сайд Н.Батшугар:

-Иргэд есдүгээр сараас эхлэн банкны картаа И‑баримтын системд холбосноор төлбөрийн баримтыг автоматаар бүртгэх боломжтой болно. Энэ нь НӨАТ-ын буцаан олголт, сугалаанд хамрагдах нөхцөлийг хялбарчилж, илүү үр дүнтэй болгоно.

Өнөөдрийн байдлаар дунджаар 1.2 тэрбум баримт хэвлэгддэг ч зөвхөн 45% нь системд бүртгэгддэг байна. Үлдсэн 55% нь бүртгэгдэлгүй хаягддаг тул энэ шинэчлэл нь үр ашиггүй байдлыг шийдвэрлэх ач холбогдолтой.

Төлбөр тооцоог картаар хийсэн тохиолдолд тухайн гүйлгээ автоматаар И-баримт руу орж, бүртгэгдэх бөгөөд дахин QR код уншуулах, гараар баримт оруулах шаардлагагүй болно.

Энэхүү шинэ системийн гол зорилго нь:

• Иргэдэд НӨАТ-ын буцаан олголтыг найдвартай авах боломж олгох
• Сугалаанд хамрагдах нөхцөлийг сайжруулах
• Цаасан баримтын хэрэглээг багасгаж, байгаль орчинд ээлтэй байлгах

Шинэчлэл 2025 оны есдүгээр сарын эхний долоо хоногоос хэрэгжиж эхэлнэ.

---