Ерөнхий сайд Г.Занданшатар "ТЭЦ-3"-ын нөхцөл байдалтай танилцлаа. Энэ үеэр Эрчим хүчний сайд Б.Чойжилсүрэн, "ТЭЦ-3"-т томилогдсон Засгийн газрын бүрэн эрхт төлөөлөгч Н.Тавинбэх нар ажлын явц, эвдрэл гэмтлийн нөхцөл байдлыг танилцууллаа.

Бүрэн эрхт төлөөлөгчөөр томилогдон ажиллаж буй Н.Тавинбэх, “Ирэх өвлийг давах төлөвлөгөөт засварын ажил өнөөдрийн байдлаар 48 хувьтай байна. Ирэх есдүгээр сарын 15-ны дотор дуусгахаар төлөвлөн ажиллаж байна. Галд өртсөн барилгыг энэ сарын 25-наас буулгаж, барилгын ажлыг эхлүүлнэ. Шинээр барих ажлыг энэ оны 11 дүгээр сарын 1-нээс өмнө дуусгахаар төлөвлөсөн" гэв.

Ерөнхий сайд Г.Занданшатар хэлэхдээ "Сэргээгдэх эрчим хүчний маш их нөөцтэй атлаа бид 400 сая ам.долларыг эрчим хүч худалдан авахад зарцуулж байна. Бид энэ мөнгөөр шинэ станц барих боломжтой байтал өнөөг хүртэл бариагүй байна. Тагнуулын ерөнхий газар 5-р цахилгаан станцын тендерт оролцсон компаниуд нэгнээ шүүхэд өгч, энэ төсөл 20 жил гацсаныг шалгах ёстой. Би ийм үүрэг өгнө. Эдийн засгийн аюулгүй байдал чухал. Шивээ говь, Багануур, 5-р цахилгаан станц гээд ийм олон төсөл яагаад гацав. Энэ бүхэн санамсаргүй үйл явдал биш.

"ТЭЦ-3"осол ч мөн адил. Санамсаргүйгээр гаднын эрх ашигт үйлчилж, дотоодын төслүүдээ нураагаад байж болохгүй. Энэ бүхний ард ашиг сонирхлын зөрчил байсан. Салбарт ажилладаг хүмүүсийн хувийн компаниар л ажил хийлгэх гэдэг, шат шатандаа мөнгө нэхдэгээ болиорой. Ашиг сонирхлын зөрчил ажилд саад болж байна. "Эрчист Монгол" компанийн хийсэн судалгаагаар эрчим хүчний салбарт ажиллах хүчний илүүдэл байна. Үүнийг шийдсэнээр 100 тэрбум төгрөг хэмнэх боломжтой" гэв.

---