Зам тээврийн осол гараад хүн бэртэж гэмтээгүй тохиолдолд жолооч нар хоорондоо ойлголцоод даатгалын компани руу цахимаар зургаа илгээгээд, хохирлоо барагдуулах боломжтой болжээ. УИХ-ын чуулганы өнөөдрийн хуралдаанаар Жолоочийн даатгалын тухай хууль нэмэлт өөрчлөлт орууллаа.

УИХ-ын гишүүн П.Мөнхтулга:

-Нийт бүртгэгдэж байгаа зам тээврийн ослын 40 хувь нь маргах шаардлагагүй осол байдаг. Энэ тохиолдолд цагдаагийн тодорхойлолт шаардлагатай байдаг байсан. Ингэж байж даатгалын нөхөн төлбөрөө авна. Харин өнөөдөр Жолоочийн даатгалын тухай хууль батлагдсанаараа ингэж шаардлагагүй боллоо. Ардаас нь мөргөсөн, эгнээ байр буруу эзэлсэн гэх мэт замын хөдөлгөөний дүрэмд ойлгомжтой заасан ослын тохиолдлууд дээр болон гуравдагч этгээд бие махбодийн хохирол учраагүй тохиолдолд шууд даатгалын компани руу гар утсаараа фото зураг илгээх боломжтой болж байгаа юм. Хоёр машин осол гаргасан тохиолдолд цагдаа, даатгал хүлээгээд тус зам дээр түгжрэл үүсдэг байсныг болиулж байна. Даатгалын компаниудын төлөөлөлтэй уулзсан, иргэддээ нөхөн олговор чирэгдэлгүй олгох боломжтой гэдгээ илэрхийлсэн. Харин намрын чуулганаар хариуцлагагүй жолооч нарт оногдуулах хариуцлагын тогтолцоог сайжруулах талаар эргэж ярилцъя гэсэн гэв. 

---