Төсвийн гуравдугаар хэлэлцүүлэг УИХ дээр явагдаж байна. "Шинэ хоршоо" хөдөлгөөний 45 тэрбум төгрөгийн санхүүжилтийг тав болгож бууруулсанд УИХ-ын гишүүн М.Мандхай маш ихээр бухимдаж байна. Тэрбээр "ХАА-н яам эсрэг санал өгсөнд маш их харамсаж байна" гэв. 

Түүний УИХ-ын чуулган дээр хэлсэн үгийг сийрүүлье. 

УИХ-ын гишүүн М.Мандхай: 

-Хариуцлагатайгаар хэлье! Би хувийн эрх ашиг яриагүй. Би монголын 220 мянган малчны ажилтай орлоготой, амьжиргаатай байх эсэх талаар ярьсан. Зээлийн батлан даалтын сангийн 45 тэрбум төгрөгийн 40-ыг хасаж хаяад, хэдхэн аж ахуйн нэгжийн урамшууллын төлөө ХХААХҮ-ийн сайд тэмцэж байна. Малчдад ээлгүй Хөдөө аж ахуйн сайдтай болжээ бид. ХАА-н яам төвийн бүсийн яам болчихсон юм байна. Монгол орон даяар явагдаж байгаа хөдөлгөөнийг дэмждэггүй, хэдхэн тооны аж ахуйн нэгжийг дэмждэг болсон юм байна. Маш их харамсаж байна. 

Биднийг өнөөдөр хоолтой ундтай, монгол ахуй соёлтой, Монголыг Монголоор нь байлгаж байгаа хүмүүс бол малчид. Сонгууль болохоор малчдадаа хайр зарлаж явчихаад сонгууль дуусахаар эсрэг ажилладаг. Ийм Хөдөө аж ахуйн сайдтай сууж байгаадаа гутаж байна. Эсрэг байсан хүмүүс нь тойрог дээрээ оччихоод "Шинэ хоршоо" хөдөлгөөний мөнгийг яагаад хассан талаараа ярих байлгүй дээ. 

Би нэг стаститик тоо хэлье. Сая Хөгжлийн банкны асуудлыг ярьж байх шиг байна. Хөгжлийн банк 3.2 их наяд төгрөгийн зээлийг 66 аж ахуйн нэгжид олгосон. Өнөөдрийн байдлаар чанаргүй зээл нь 80 гаруй хувьтай. Гэтэл "Шинэ хоршоо" хамгийн амжилттай явж байгаа. Зээлийн эргэн төлөлт явагдаж эхлээд хоёр сар болж байна. Арилжааны банкууд дээр хугацаа хоцорсон зээл нэг ч байхгүй. 20 гаруй тэрбум төгрөгийн эргэн төлөлт хийгдсэн, татварын санд 500 гаруй сая төгрөг төвлөрүүлчихээд байна. 

Малчид бол зээлээ төлдөг. Харин Чанаргүй зээл аж ахуйн нэгж дээр үүсдэг шүү дээ гэв. 

---