"Ц.Мөнхтуяа гишүүний дипломтой холбоотой асуудлыг хуулийн байгууллага шалгана. Дав.Цогтбаатар гишүүнийг эгүүлэн татах эсэхийг намрын чуулганаар л ярьж таарах нь" гэж УИХ-ын гишүүн, Төрийн байгуулалтын байнгын хорооны дарга Ж.Бат-эрдэнэ хэллээ. 

УИХ-ын гишүүн, Төрийн байгуулалтын байнгын хорооны дарга Ж.Бат-эрдэнэ:

- Ц.Мөнхтуяа гишүүний дипломтой холбоотой асуудлыг хуулийн байгууллага шалгах ёстой. Хууль бус үйлдэл хийсэн бол үүнийг прокурорын байгууллага УИХ-д өргөн барьж, оруулж ирэх ёстой. Энэ хүний бүрэн эрхийг түдгэлзүүлж байж шалгана гэдэг утгаар. Адилхан сонгогдсон гишүүд учраас нэг нэгнийхээ асуудалд хяналт тавих нь буруу гэж хувь хүнийхээ хувьд үздэг. Гэхдээ асуудал үүссэн тохиолдолд хууль дүрмийнхээ хүрээнд, хуулийн байгууллага шалгах ёстой.

Жагсаалт, тойргоос сонгогдсон гэээд ялгаж болохгүй. Нэг хэсэг нь тойргийн иргэдээсээ сонгогдож төлөөлөл нь болж байгаа бол нөгөө хэсэг нь бодлогын түвшинд ажиллах нь зүйтэй гэдэг утгаараа холимог байдлаар сонгууль зохион байгуулагдсан шүү дээ.

Дав.Цогтбаатар гишүүний асуудал удахгүй хэлэлцэгдэхээр орж ирнэ гэж бодож байна. Шүүхийн шийдвэр хэрэгжих л ёстой. Гишүүнийг эгүүлэн татах эсэхийг намрын чуулганаар л ярьж таарах нь гэв. 

---