Нийслэлийн эрүүгийн хэргийн давж заалдах шатны шүүхэд өчигдөр гадаадын тагнуулын байгууллагатай хамтарсан хэрэгт ял шийтгүүлсэн А.Мөнхтулга, түүний өмгөөлөгч Б.Энх-Амгалан, Г.Батцэцэг нарын гаргасан гомдлын дагуу хянан хэлэлцжээ.

Тэрбээр Азийн нэгэн орны тусгай албаныханд ажлын шугамаар олж авсан мэдээллээ дамжуулан өгсөн хэрэгт холбогдсон аж. Тагнуулын ерөнхий газрын Мөрдөн шалгах газарт шалгаж нийслэлийн Прокурорын газраас Эрүүгийн хуулийн 19.4-2 дахь хэсгийн “Монгол Улсын иргэн гадаад улсын тагнуулын албатай хамтран ажилласан гэмт хэргийг төрийн нууцыг итгэмжлэгдэн хариуцсан, албан тушаал, ажил үүргийн хувьд мэдсэн этгээд үйлдсэн” гэх заалтын дагуу яллах дүгнэлт үйлдэн шүүхэд шилжүүлсэн юм. Баянзүрх, Сүхбаатар, Чингэлтэй дүүргийн эрүүгийн хэргийн анхан шатны тойргийн шүүх уг хэргийг энэ оны дөрөвдүгээр сарын 16-нд хаалттай хянан хэлэлцээд 12 жилийн хугацаагаар хорих ял оноосон юм.

Тэгвэл өчигдөр давж заалдах шатны шүүхийн шүүгч Т.Шинэбаяр даргалж, шүүгч Г.Ганбаатар, Б.Ариунхишиг нарын бүрэлдэхүүнтэй, прокурор Ц.Сэргэлэнбаатар, шүүгдэгч А.Мөнхтулга, түүний өмгөөлөгч Б.Энх-Амгалан, Г.Батцэцэг нарыг оролцуулан хаалттай хэлэлцсэн хурлаас анхан шатны шүүхийн шийтгэх тогтоол хуульд нийцсэн, гэм бурууд шийтгэл нь тохирсон гэж дүгнэн ялыг хэвээр нь үлдээжээ. 

---