Дундговь аймгийн Сайнцагаан суманд үйл ажиллагаа явуулдаг хүнсний дэлгүүрийн худалдагчийг “Зургаан ширхэг зайрмаг зээлсэнгүй” гэж зодож танхайрсан хэрэг зургаадугаар сарын 27-ны өдөр гарсан. Тус аймгийн Цагдаагийн газраас тухайн этгээдэд холбогдох гомдлыг хүлээн авч мөрдөн шалгах ажиллагаа явуулж байгаа бөгөөд шүүхийн зөвшөөрөлтэй 48 цагийн хугацаатай баривчлах асуудлыг Прокурорын байгууллагад хүргүүлээд байгаа аж. 

Уг хэргийн талаар Дундговь аймгийн Засаг дарга С.Мөнхчулуун: 

-Ажлаа хийж байсан дэлгүүрийн худалдагч эмэгтэйг зодсон этгээдийн асуудлаар аймгийн цагдаагийн даргаас тодрууллаа. Зургаадугаар сарын 27-ны өдөр дуудлага мэдээлэлдээ бүртгээд холбогдогчийг саатуулсан. Хохирогч 28-нд хотруу явсан. Энэ хэрэг гомдлын бүртгэлд бүртгэгдсэн шалгагдаж байгаа. "Хэрэг хянан шийдвэрлэх ажиллагаатай холбоотой асуудал прокурорын зөвшөөрлөөр явагддаг учраас дэлгэрэнгүй мэдээлэл өгөх боломжгүй байна" гэж мэдэгдсэн болно.

Мөн хохирогчийн дүүтэй холбогдож тодрууллаа. Эгчийнх нь биеийн байдал хүнд, хараа нь муудаж байгаа талаар хэллээ. Цагдаагийн байгууллага хэрэг хянан шийдвэрлэхдээ гомдлыг хүлээн авах, мөрдөн шалгах, прокурорын хяналт, шүүхэд шилжүүлэх гэх мэт үйл явцыг хуульд заасан хугацааг дагаж мөрддөг учир хөндлөнгөөс оролцох, хурдлуулах боломжгүй байдаг юм. Гэхдээ нэгэнт ийм тодорхой асуудал учир түргэн шуурхай шийдэгдэнэ гэж итгэж байна гэжээ. 

---