Big Bang хамтлагийн гишүүн Taeyang Монгол Улсад тоглолтоо хийх гэж байгаа билээ.
Стадионд болох тус тоглолтод мянга мянган залуус цугларч, к-рор соёлоор нэг үдэш амьсгалах нь. Харин дэлхийн хэмжээний тус дуучин тоглолтынхоо хамтрагчаар өөрийн улсын брэнд бүтээгдэхүүн болох “Теrrа” шар айргийг сонгосон нь маргаан дагуулаад байна.

Taeyang-ийн Төв цэнгэлдэх хүрээлэнд хийх нэг л өдрийн тасалбарын орлого нь 4 тэрбум төгрөг хол давж байгаа аж. Үүнд дээр нэмээд солонгос шар айраг, сөжүнд нь хэдэн төгрөг хэдхэн цагийн дотор үрэгдэх бол оо? Тэгэхээр энэ хэмжээний орлого нэмээд, энэ хэмжээний хөрөнгө оруулалт гээд ухвал их л том тоо гарч ирэх нь. Монголд солонгосчууд ирээд л биднийг хожоод буцах нь дээ.
Хэрвээ уг тоглолтын ивээн тэтгэгчээр дотоодын ААН-үүд оролцсон бол дор хаяж нэг тэрбум төгрөгийн эдийн засгийн эргэлт Монгол улсад үлдэх байлаа. Хамаг мөнгөө хэдхэн цагийн дотор Солонгос руу гаргачихаад ардаас нь монголчууд маань дотроо үзэлцээд л дуусдаг байдлыг өөрчилмөөр байна.

Алдартай хамтлаг, дуучид том хэмжээний шоу тоглолт, томоохон соёлын арга хэмжээ зохион байгуулах тохиолдолд дотоодын ААН-үүдийн оролцоог хангаж, бүтээгдэхүүнийг борлуулдаг болох нь жинхэнэ эх оронч үзэл юм.

Эх орондоо эх орныхоо бүтээгдэхүүнийг эдэлж хэрэглэж байж бид эх орондоо зохион байгуулагдаж байгаа том хэмжээний тоглолтоос ашиг хүртэнэ. Тэр хэрээр монгол уран бүтээлчдээ, монгол хүнсээ, монгол үйлдвэрлэлээ гадагш нь гаргаж дотооддоо мөнгө оруулж ирэх боломж маань нэмэгдэнэ.

---