ЭМЯ-ны харьяа хавдрын тусламж, үйлчилгээ үзүүлдэг ХСҮТ, УНТЭ, УХТЭ, УГТЭ, ЭСҮТ, ЭХЭМҮТ, ЭНЭҮТ зэрэг эрүүл мэндийн байгууллагууд, аймаг, нийслэлийн эрүүл мэндийн газар, нэгдсэн эмнэлэг, бүсийн оношилгоо эмчилгээний төв, хувийн хэвшлийн төлөөлөл, төрийн бус байгууллагуудын төлөөлөл, хавдар судлаач эмч нарын 250 орчим төлөөлөл зөвлөлдөж байна.

Эрүүл мэндийн сайд Т.Мөнхсайхан:

-Хавдрын тусламж үйлчилгээг иргэн төвтэй болгох цогц шинэчлэлийн ажлыг өнгөрсөн арван сарын хугацаанд хийж хэрэгжүүлсэн. Цаашид аймаг, дүүргүүдэд хэрэгжүүлэх талаар үндсэн танилцуулгаа өнөөдөр хийж байна. ХСҮТ хүртэлх оношилгоо, шинжилгээ, ХСҮТ-ийн тусламж үйлчилгээний оочир дугаарын чирэгдлийг бууруулах гэсэн үндсэн хоёр чиглэлээр ажиллаж байна. Зөвлөгөөнөөр 330 сумын бүх өрхийн эмнэлгүүдэд хавдрын тусламж үйлчилгээ авч буй иргэдийн мэдээллийг хүргэж байна. Үүний үндсэн дээр харьяалалд байгаа хавдартай иргэдийг хяналтдаа авч, 13А маягтыг цахим болгох шийдэлд хүрнэ. Иргэн тухайн аймаг, дүүрэг дээрээ шаардлагатай шинжилгээгээ бүрдүүлээд ХСҮТ-д очсоноор ачаалал үүсгэхгүй үйлчлүүлэх боломж бүрдэж байна. 

Мөн ХСҮТ-ийн доторх эмнэлгийн зохион байгуулалт дээр онцгой анхаарал хандуулж байна. Арванхоёрдугаар сарын 01 гэхэд үйлчлүүлэгч ямар нэгэн чирэгдэлгүйгээр тав хоногийн дотор бүх оношоо тогтоож, эмчилгээнийхээ асуудлыг шийдүүлдэг болох болно. Мөн өнөөдөр цаг авахад маргааш нь очоод үзүүлэх боломжтой болно. Иргэд өнгөрсөн зургаан жилийн хугацаанд хоёр сарын турш оочирлож үйлчилгээ авдаг байсан. Тэгвэл бид зөв зохион байгуулалт санхүүжилтийг хийснээр туяа эмчилгээг хийлгэх шаардлагатай л бол маргааш нь хийлгэх боломжийг бүрдүүлнэ. Төвлөрлийг сааруулахын тулд аймаг, дүүргийн тусламжийг сайжруулах бодлого маань хэрэгжиж эхэлж байна. Мөн хавдрын тусламж үйлчилгээг өргөжүүлэх зорилгоор хойд бүсийн хавдрын төвийг бий болгож байна. ХСҮТ-ийн өргөтгөлийн барилгыг худалдаж авах тендер сонгон шалгаруулалтын шатандаа явж байна гэлээ. 

---