"Кабинетын зарчим гэх чөдөр тушаагүй болсон цагт сөрөг хүчний үүргээ гүйцэтгэж, хүчтэй шүүмжилж ажиллана" гэж Аж үйлдвэр, эрдэс баялгийн сайд Ц.Туваан хэлж байна.

УИХ-ын гишүүн, Аж үйлдвэр, эрдэс баялгийн сайд Ц.Туваан:

-Хамтарсан засгийн газрын гэрээг зөрчсөн гэдэг зүйл заалттай танилцмаар байна. "Огцрох амархан" жагсаалд Ардчилсан намын гишүүд нэгдсэн гэдэг нь зүгээр л шалтаг. Бага хурал өөр асуудал хэлэлцэнэ гэж байсан ч ийм байдал хүрлээ. Гайхаж л байна. Ардчилсан намын ҮБХ, бүлэг хуралдаж байж хамтарсан засгийн газарт орж ажилласан. Зүгээр найман гишүүн засагт оръё гээд л орчихоогүй шүү дээ.

Мега төслүүд маань цааш нь үргэлжлээсэй л гэж хүсэж байна. Иргэд маань ухаантай. Ардчилсан намын сайд нар чадлаараа л ажилласан. Миний хувьд иргэдийнхээ амьдралыг сайжруулж, ДНБ-ийг 10 мянган ам.долларт хүргэчих юмсан гэдэг чин хүслээр ажилласан. Даанч хугацаа бага байлаа. Кабинетын зарчим гэх чөдөр тушаагүй болсон цагт сөрөг хүчний үүргээ гүйцэтгэж, хүчтэй шүүмжилж ажиллана гэв. 

---