УИХ-ын гишүүн О.Батнайрамдалтай сүүлийн үед үүсээд байгаа асуудал, тэр дундаа Хамтарсан Засгийн газар байх шаардлагатай эсэх, Ерөнхий сайдыг огцруулах ёстой эсэх талаар ярилцаж, байр суурийг нь сонслоо. Тэрбээр "Энэ бүхний ард уул уурхайн баялагт хэн эзэн суух вэ гэдэг тэмцэл өрнөж байна" гэж үзэж байна. 

УИХ-ын гишүүн О.Батнайрамдал: 

-Хамтарсан Засгийн газар байх эсэх нь Монгол Улсын хөгжил дараагийн шатанд гарч чадах уу гэдэгтэй уялдана. Уул уурхайгаас орж ирж байгаа ашгийг шударгаар хуваарилж чадах уу гэдэг асуудалтай холбогдоно. Үндсэн хуулиндаа суулгаж, 20 жил хэрэгжүүлж чадаагүй ирсэн Үндэсний баялгийн сангийн хуулийг хөдөлгөж чадах уу гэдгийг хөндөнө. 

Засгийн газрын тэргүүн олон тэмцлийн ард гарсан. Нүүрсний хэргүүд, Эрдэнэтийн 49 хувь, Дубайн гэрээ зэрэг тийм ч амархан шийдэгдээгүй шүү дээ. Одоо л бидэнд Баялгийн санг шийдэх үүлэн чөлөөний нар гарч байна. Одоо л бидэнд Оюутолгой, Онтрегийн асуудлыг шийдэх үүлэн чөлөөний нар гарч байна. Засгийн газар тогтвортой байгаад энэ бүхнийг урагшлуучихаасай. 

Зөвхөн энэ Засгийн газрыг гэлтгүй, том төсөл хөдөлж, их мөнгөний сураг гарах бүрд асуудал тулгарч байсан байдаг. Олон нийтийн төлөө хоёр алхам урагшлах уу, эсвэл ганц хоёр компанийн эрх ашгийн төлөө арван алхам хойшлох юм уу... 

Оюутолгой ч, Онтре ч, Ухаа худаг ч стратегийн орд газар уу гэвэл тийм. Стратегийн орд мөний хувьд 34 хувийг эзэмших үү, эсвэл АМНАТ төлөх үү гэдэг гэрээ хийх цаг нь. Энэ бүхнийг шийдэж чадах уу гэдэг асуудал Засгийн газрыг огцруулах уу, үгүй юу гэдэг асуудалтай шууд холбогдож байгааг олон нийт ойлгох хэрэгтэй гэв. 

---