Өнөөдөр төрийн ордонд "халуухан үйл явдал"-ууд өрнөсөөр байна. УИХ дахь МАН-ын бүлгийн хуралдаанд намын дарга нь ЕНБД-тайгаа, мөн УИХ-ын дарга Д.Амарбаясгалан оролцож, намын даргынхаа талаар үүсээд буй улс төрийн нөхцөл байдлыг ярилцжээ.

Үүний дундуур Ерөнхий сайд Л.Оюун-Эрдэнэ Ерөнхийлөгч У.Хүрэлсүхтэй уулзсан бөгөөд төрийн тэргүүний зүгээс Ерөнхий сайд Л.Оюун-Эрдэнэд улс төрийн соёл харуулж "Өөрөө ажлаа өг. МАН дангаараа Засгийн газраа байгуулах ёстой" гэсэн бол Ерөнхий сайд Л.Оюун-Эрдэнэ "Хамтарсан Засгийн газар байхгүй бол би ажлаа өгнө" гэжээ. 

Ерөнхий сайд үргэлжлүүлэн намын бүлгийн хуралдаа орсон бөгөөд дөнгөж сая бүлгийн хурал дуусчээ. Хуралдаанаас ойрын хугацаанд МАН-ын Удирдах зөвлөлийг хуралдуулж, цаашлаад хамтарсан Засгийн газартай байх уу, үгүй юу гэх асуудлыг ярилцахаар тогтлоо гэсэн албан мэдээ гаргасан байна.

Албан мэдээнээс анхаарал татаж буй нэг өгүүлбэр нь "улс төрийн нөхцөл байдлыг тал талаас нь ярилцах нь зүйтэй" гэсэн байр суурь бий. 

Ер нь бол хамтарсан засгийн газарт Ардчилсан нам орсон нь буруу гэх шүүмжлэл ганц нэг гишүүдээс нь гарч цөөн хэдэн хэвлэлээр мэдээлсэн төдий. Тэрнээс бус МАН-ын Бага хурлыг хуралдуулах хэмжээнд очтолоо нийгмийн шүүмж болоогүй нь үнэн. Гэтэл гэнэт л УИХ дахь МАН-ын бүлгийн хуралдаанаар хамтарсан засгийн газартай байх уу, үгүй юу гэх асуудал яригдаж, тун ойрмогхон тус намын бүтцийн байгууллагууд хуралдан шийдвэр гаргах гэж байгаа нь тун ойлгомжгүй нөхцөл байдал үүсгээд байна. Ний нуугүй хэлэхэд, хамтарсан засгийн газарт багтсан АН, ХҮН-ын удирдлагууд ч гайхшаа барж суугаа бололтой.

Үүний цаана улс төрийн нэг тохироо байгаа нь Ерөнхий сайдаа хэрхэн нэр цэвэр огцруулж, Засгийн газрыг хэрхэн нэр цэвэр тараах тухай юм. Сүүлийн хоёр сонгууль дараалан ард түмнээс үнэмлэхүй ялалт авсан тус намын удирдлага "хүү бэрийн тансаглал" гэх мэтхэнээр Засгийн газраа огцруулж улс төрийн хариуцлагагүй байдал үүсгэж болохгүй. Тэгээд ч Ерөнхий сайд Л.Оюун-Эрдэнийн хувьд залуу хүн, цаашдын улс төрийн карьерыг нь бодсон ч тэр нэр цэвэр огцруулах ёстой гэх байр суурь гарсан талаар эх сурвалж мэдээллээ. 

МАН-ын удирдлагуудын баримталж буй байр суурь бол Ерөнхий сайдын хүүг гадаадаас авчирч хөрөнгө орлогоо шалгуулж, тайлбар хийж байх хугацаанд намын Удирдах зөвлөл болоод Бага хурал хуралдах аж. Тус хурлаараа "Ард түмэн шүүмжлээд байгаа учраас хамтарсан засгийн газрыг тарааж, МАН дангаараа засаг байгуулна. Айсуй 2027,2028 оны сонгуульд хийсэн ажлаа зөвхөн намдаа нааж нэр цэвэр орох" гэхчилэн шийдвэр гаргахаар төлвлөжээ.

Үүний дараа мэдээж Л.Оюун-Эрдэнийн Засгийн газар бүрэн бүрэлдэхүүнээрээ бууна. Ерөнхий сайд нэр цэвэр улс төрийн шийдвэрийн дагуу ажлаа өгнө. Дараагийн Ерөнхий сайд дан МАН-ын гишүүдээс бүрдсэн багаар бүтцээ томилох аж. 

---