?Ж.Бат-Эрдэнэ: Дотоодын гурилын үйлдвэрүүд монополь байгаа

"Монгол Улсад газар тариалангийн салбар шаардлагагүй гэдэг бодлогыг УИХ өнөөдөр баталлаа" гэж ХХААХҮ-ийн сайд Ж.Энхбаяр бухимдсан бол, УИХ-ын гишүүн, Төрийн байгуулалтын байнгын хорооны дарга Ж.Бат-Эрдэнэ эсрэг саналтай байна. Тэрбээр "Дотоодын гурилын үйлдвэрүүд монополь байгаа. Хязгаарлалтыг чөлөөлснөөр гурилын үнэ буурсан" гэв.

УИХ-ын гишүүн, Төрийн байгуулалтын байнгын хорооны дарга Ж.Бат-Эрдэнэ: 

-Гурилын 32 үйлдвэр байсан. Гэтэл одоо 5-6-хан үйлдвэр үлджээ. Төрөөс явуулсан бүхий л дэмжлэгийг энэ 5-6-хан үйлдвэр хүртэж ирсэн. Бүхий л талаар дэмжээд байхад гурилын үнэ буураагүй, харин ч нэмсэн. Зах зээлдээ монополь болсон. Үгсэн хуйвалддаг болсон байсан. Сайхан сайхан зүйл ярьдаг ч ажил хэрэг болгоогүй. Лаборатори байгуулна гэсэн, байгуулаагүй.

Иймд гурил, будааны импортын хоригийг цуцалсан. Үүний дүнд гурилын үнэ буурсан шүү. Монголчууд хямд гурил идэж эхэлсэн. 

Гурил бол манай стратегийн хүнс. Ядуурал 30 хувьтай хэвээр байна. Хүмүүс өнөөдөр талбай дээр жагсаж байна. Энэ бол ард түмний амьжиргааг хаясантай холбоотой. Ийм учраас гурилын зах зээл рүү төр орохоос өөр аргагүй болсон. Төр гурилын үнийг тогтвортой байлгана. 

Үүнээс болоод Монголд газар тариалангийн салбар унахгүй. Засгийн газар бодлогоо гаргаад ажиллах ёстой гэв.