Зээлийн мэдээллийн тухай хуульд нэмэлт, өөрчлөлт оруулах тухай хуулийн төсөл өнөөдрийн УИХ-ын чуулганаар батлагдлаа.

Энэхүү хууль батлагдсанаар хар жагсаалтад орсон 200 мянган зээлдэгчийн мэдээлэл үгүй болж, онооны системд шилжих, улмаар зээлийн хүү буурах нөхцөл бүрдэж байгаа аж. 

УИХ-ын гишүүн, Инновац, цахим бодлогын байнгын хорооны дарга Э.Батшугар:

-Энэ хууль батлагдсанаар зээлдэгчийн хар жагсаалт гэдэг зүйл байхгүй боллоо гэж ойлгож болно. Онооны системд шилжиж байна. Энэхүү систем нь 1989 онд АНУ-д анх үүсээд, улмаар бүхий л улс орнууд хэрэглэж байгаа юм. 

Онооны системд шилжсэнээр зээлийн хүү буурна. Барьцаа хөрөнгийн нөхцөл суларна. Өндөр оноотой, санхүүгийн сахилга баттай, зээлээ цаг хугацаанд нь төлдөг иргэнд хүү багатай, урт хугацааны, барьцааны уян хатан нөхцөлтэй зээл олддог болно. Банкууд зээл өгөхийн төлөө өрсөлддөг болно. 

Таны зээл авч байсан банк бусадтайгаа таны мэдээллийг хуваалцдаггүй байсан. Өөрөөр хэлбэл, та өөр банкнаас зээл авахаар болбол тэнд таны мэдээлэл байхгүй, зээл өгч байсан банк чинь тэр мэдээллийг бусдад өгдөггүй байсан гэсэн үг. Одоо онооны системд шилжсэн учир та дурын банкнаасаа үйлчилгээ авах боломжтой болно гэв. 

---