Д.Амарбаясгалан: УИХ-ын гишүүд хэндээ эрхлээд байгаа юм. Ажлаа хий

УИХ-ын чуулганы үдээс хойших хуралдаан эхэлсэн ч Ардчилсан намын гишүүд танхимд орж ирж хуралдаанд оролцсонгүй. УИХ-ын дарга Ардчилсан намын бүлгийн гишүүдийг чуулгандаа орж ирэхийг шаардаж, таван минутын хугацаа өгсөн боловч гишүүд орж ирсэнгүй. УИХ-ын дарга Д.Амарбаясгалан тус асуудалтай холбогдуулж байр сууриа илэрхийлэв.

УИХ-ын дарга Д.Амарбаясгалан:

-УИХ-ын үйл ажиллагаа гэдэг бол хэн нэг хүн, хэсэг бүлэг нөхдийн хоорондоо ойлголцоогүй, бие биеэ эмзэглүүлэх үг хэлсэнтэй холбоотойгоор гацаж, саатаж байдаг зүйл огт биш. Би өглөө завсарлага өгсөн шалтгаан бол уучлал гуйх гуйхгүйтэй огт холбоогүй. Хэрэв хамтарсан Засгийн газар байгуулсан Монгол ардын нам, Ардчилсан нам, ХҮН намын хооронд үл ойлголцол улс төрийн асуудал байгаа бол хамтарсан Засгийн газар байгуулсан зөвлөл уулзаж асуудлаа ярих хэрэгтэй. Энэ улсын их хурлын асуудал огт биш. Тэгэхгүйгээр нэг нэгэндээ гомдсон туньсан байдалтайгаар УИХ-ын үйл ажиллагааг тасалдуулж болохгүй. Энд төрийн ажил явж байна. Аль аль талдаа зарчимтай, хүндэтгэлтэй хандах хэрэгтэй. Цаашид хоёр гишүүд үг чулуудсанаас болж УИХ гацаж, саатдаг үйл ажиллагаа руу орох юм уу. Би бол оруулахгүй. 

УИХ-ын гишүүд хэндээ эрхлээд байгаа юм. Ард түмэнд эрхэлнэ гэж байхгүй. Ард түмэн ажлаа хий гээд сонгочихсон. Ард иргэдийн аж амьдрал тийм сайхан байна гэж бодож байгаа юм уу. Танхимд хэрүүл хийгээд сууж байхаас ард түмний амьдралыг яаж сайжруулах уу, орлогыг нь яаж нэмэх үү, үүсээд байгаа эдийн засгийн нөхцөл байдалтай холбоотой асуудлыг хэрхэн даван туулах уу гээд хэрэлдээд сууж байх ёстой. Гэтэл ялих шалихгүй асуудал дээр хэрүүл хийгээд бойкот хийх гээд сууж байдаг. Би аль аль намд нь хандаж хэлж байгаа шүү. Улс төрчид ер нь зарчимтай байх ёстой шүү гэв.