Иргэд эрүүл мэндийн тусламж үйлчилгээг хангалттай сайн авч чадахгүй нөхцөл байдалтай байна. Уг асуудлаар Эрүүл мэндийн сайд Т.Мөнхсайханаас тодрууллаа. 

Эрүүл мэндийн сайд Т.Мөнхсайхан: 

-Эрүүл мэндийн даатгалын санхүүжилт 320 тэрбумаар нэмэгдэж, 2,3 их наяд төгрөгийн санхүүжилттэй болсон. Үүнээс 700 орчим тэрбум төгрөгийн санхүүжилтийг олгосон. Одоо ЭМДС-нд 1,6 их наяд төгрөгийг олгоно. Үүнийг он дуустал сар бүр эмнэлгүүдэд тэгш хуваарилна.

Уг санхүүжилт эрүүл мэндийн тусламж үйлчилгээг иргэдэд хязгаарлалтгүйгээр үзүүлэх хэмжээнд хүрэхгүй байна. Манай улсын эрүүл мэндийн салбарт тавигдаж байгаа санхүүжилт ДНБ-ний 3 хувьтай тэнцэж байна. Олон улсад дор хаяж 6 хувьд хүргэж байж эрүүл мэндийн тусламж үйлчилгээг хязгаарлалтгүйгээр үзүүлэх боломжтой байдаг. 

Өнгөрсөн жилийн сүүлийн гурван сард эмнэлгүүдэд санхүүжилт олгогдоогүй. Тиймээс энэ жил илүү сахилга баттай энэ тэнцүү санхүүжилтийг хуваарилж байгаа.

Цар тахлын үед эрүүл мэндийн даатгалын сангаас 700 тэрбум төгрөг зарцуулсан. Үүнээс болж даатгалын сан доголдсон хэвээр байна. Энэ жил нэмэлтээр 320 тэрбум төгрөгийн санхүүжилт тавьж, хүнд нөхцөл байдлаасаа гарч байна гэв.

---