УИХ дахь Ардчилсан намын бүлэг тодорхой хуулийн төслүүдээр УИХ-ын чуулганы хуралдаанаас гурав хоногийн завсарлага авахыг хүссэн ч УИХ-ын дарга нэг өдрийн завсарлага өглөө. 

УИХ-ын дарга Д.Амарбаясгалан:

-УИХ, Засгийн газрын гишүүд бие биедээ харилцан хүндэтгэлтэй хандаж байх учиртай. Бид төрийн ажлыг тасалдалгүй явуулах үүрэг хүлээсэн. УИХ дээр мэтгэлцэх, маргалдах олон зүйлс өмнө нь гарч байсан. Цаашдаа ч гарах байх. Гэхдээ харилцан хүндэтгэлтэй байж, төрийн ажлыг явуулах зарчим дээр суурилж, ажлыг явуулах ёстой.

УИХ-ын гишүүдээс үе үе гомдлууд ирдэг. Байнгын хороо, УИХ-ын чуулганы нэгдсэн хуралдаан дээр асуусан асуултад хариулт өгч байгаа албан тушаалтан оновчтой хариулт өгөхгүй байна, тойруулж байна, буруу зөрүү хариулж байна. Түүнчлэн хариулж байгаа өнгө аяс нь ихэрхсэн хэлбэрээр хариулж байна гэдэг гомдол санал гарч байгаа. УИХ-ын гишүүдийн асуулт нь мэргэжлийн, оновчтой, зарчимтай байх ёстой.

УИХ ард түмнээс сонгогдсон бага ард түмний үүргийг гүйцэтгэж төлөөлж байгаа институт. Тэр утгаараа бүх асуудалд хариуцлагатай хандах ёстой. Аливаа байдлаар асуудалд субьектив хандахгүй байхыг гишүүд анхаарлаа авч ажиллах нь зүйтэй. Энэ мэт асуудлаас үүдэлтэйгээр УИХ дээр хэлэлцэх асуудалд саад учирч, төрийн ажил явахад бэрхшээл тулгардаг байж болохгүй. Цаашдаа ийм зүйлийг хүлээж авах боломжгүй.

УИХ-ын гишүүд хуулиар хүлээсэн эрх үүрэгтэй. Чуулганы танхимд хэлсэн үгэндээ хариуцлага хүлээхгүй. Үүнийгээ далимдуулж бие биеийнхээ нэр хүндэд халдаж болохгүй. УИХ-ын гишүүд хэт эмзэг байгаад хэрэггүй. Улс төрийн ажил олон хэлбэрээр явагддаг. Гүтгэх, доромжлуулах гээд олон нөхцөл байдлыг улс төрч хүн туулдаг. Ийм нөхцөлийг давсан хүн улс төрч болдог гэв. 

УИХ-ын чуулган үдээс хойш 14:00 цагаас хуралдаж, Хүний эрх, эрх чөлөөний байдлын талаарх 24 дэх илтгэлийг сонсоно. 

---