Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг УИХ-ын нэгдсэн чуулганаар хэлэлцэж байна.

Гурил, улаан буудайн импортын татварыг тэглэсэн шийдвэрийг цуцлах эсэхэд гишүүд асуулт асууж, хариулт авч байна.

УИХ-ын гишүүн Х.Баасанжаргал:

-Буцаад татвартай болбол улаан буудай болон гурилын чанарын үзүүлэлт хэрхэн сайжрах вэ? Шинжилгээнд ирсэн дотоодын улаан буудайны 70 хувь, гадаадын улаан буудайны таван хувь нь шаардлага хангахгүй байна. Дотоодын үйлдвэрлэлээ дэмжсэн ч чанартай улаан буудай, гурил үйлдвэрлэхгүй байгаа энэ тохиолдолд яах вэ? Импортын улаан буудай, гурил илүү чанарын шаардлага хангаж байна гэсэн дүгнэлтүүд гарч байна.

Энэ аль нэгэн тойргийн асуудал биш. Монголчуудын эрүүл мэндийн асуудал. Дотоодын үйлдвэрлэлийг дэмжих олон зээл тусламж гарлаа. Гэтэл үйлдвэрүүдийн тоо улам цөөрөөд байна. Баяжуулах хүнсний тухай хууль гарсан ч гурил дээр огт хэрэгжээгүй гэдэг дүгнэлт гарсан. Дотоодын үйлдвэрүүд яагаад баяжуулсан гурил үйлдвэрлэхгүй байна вэ?

Хүнс, хөдөө аж ахуй, хөнгөн үйлдвэрийн сайд Ж.Энхбаяр:

-Татвараас чөлөөлсөн хууль баяжуулсан болон баяжуулаагүй бүх гурилыг хилээр татваргүй оруулахыг нээгээд өгсөн. Ингээд үндэсний үйлдвэрүүд баяжуулсан гурил хийхээ зогсоосон. Өрсөлдөөн их, ашиггүй байгаа учир үйлдвэрүүдийн тоо цөөрч байна. Одоо есөн үйлдвэр үйл ажиллагаа явуулж байна. Хоёр үйлдвэр үйл ажиллагаагаа зогсоосон. Таван үйлдвэр хүндрэлтэй байна гэдгээ мэдэгдсэн. Дотоодын үйлдвэрлэлийнхээ 40 хувийг алдаад байна.

"Хүнсний хувьсгал" хөдөлгөөний үр дүнд 2019-2023 он хүртэл дотооддоо 100 хувь тарьж, үйлдвэрлэдэг байсан үйлдвэрлэл 60 хувь руу буурч, 40 хувийг нь гадны зах зээлд алдсан байна. Энэ байдал цааш үргэлжилбэл дотоодын гурил үйлдвэрлэл тэсэж үлдэхгүй.

Монголын гурилын чанар тасралтгүй сайжирч байгаа. Дэлхийн нэг номерын технологийг манай үйлдвэрүүд суурилуулж дууссан. Тариа цэвэр, ургац тогтмол нэмэгдэж байгаа. Би чанаргүй гурил үйлдвэрлэдэг гэдэгтэй санал нийлэхгүй гэв. 

---