Урлагийн гавьяат зүтгэлтэн Балчинжавын Долгион /2025.04.23/ таалал төгсчээ. Тэрбээр 1957 оны 5-р сарын 8-нд Улаанбаатар хотноо мэндэлж, монголын соёл урлагийн салбарт өөрийн гэсэн өнгө төрхөө дархалж, үнэтэй хувь нэмрээ оруулж явсан эрхэм хүмүүн юм.

Тэрбээр 200 гаруй дууны ая зохиосон бөгөөд  “Урин хавар ирлээ” дуу хамгийн анхны уран бүтээл нь. Түүний урлагийн замнал 1974 оноос эхлэлтэй бөгөөд “Зүрхний үг”, “Эх үрсийн элбэрэл”, “Сэхүүн салхи”, “Ганцхан чамдаа”, “Инээмтгий хүн”, “Хүрээ хүүхнүүд”, “Зуны дурлал”, “Учралын блюз”, “Хослон дуулъя”, “Намрын гуниг” зэрэг түмний сэтгэлд шингэсэн олон арван уран бүтээл туурвижээ. 

Тэрбээр Инээмсэглэл хамтлагийн гишүүн байсан бөгөөд “Пентатоник” академийн ерөнхийлөгчөөр ажиллаж байсан. Таалал төгсөх хүртлээ хөгжмийн зохиолоо бичиж, манай телевизтэй хамтарсан уран бүтээл болох "Соёл кафе" нэвтрүүлгээ хөтөлж, ард түмэндээ хотын соёлыг түгээн дэлгэрүүлэх хувь нэмрээ оруулсаар явсан билээ.

Б.Долгион агсны гэр бүл үр хүүхдүүдэд нь гүн эмгэнэл илэрхийлье. 

---