Э.Болормааг УИХ-ын гишүүнээр сонгогдсонд тооцсон тогтоолыг хүчингүй болгох асуудлаар СЕХ-нд ханджээ

УИХ-ын гишүүн Э.Болормааг гадаадын хөрөнгө оруулалттай компаниас сонгуулийн хандив авсан хэмээн буруутгаж, нэр бүхий иргэд Үндэсний аудитын газарт хандаж байв. Тэгвэл хуульч, өмгөөлөгч Б.Мэргэн нь Э.Болормааг хууль зөрчиж гишүүн болсон учраас түүнийг УИХ-ын гишүүнээр сонгогдсонд тооцож, үнэмлэх гардуулж, нийтэд зарлан, УИХ, Ерөнхийлөгчид өргөн мэдүүлсэн тогтоолынхоо Э.Болормаад холбогдох хэсгийг хүчингүй болгож шийдвэрлэх ёстой хэмээн үзэж, Сонгуулийн ерөнхий хороонд хандсан байна.

Хуульч, өмгөөлөгч Б.Мэргэн:

-Төрийн албанд яагаад гадаад улсын иргэнийг ажиллуулдаггүй вэ? Хамгийн энгийн тайлбараар бол Монголын биш гадны бодлогын төлөө ажилладаг гар хөл болчих магадлалтай, тусгаар тогтнол, үндэсний аюулгүй байдалд харш гэж үзэж байгаа хэрэг.

Тэгвэл яагаад Сонгуулийн тухай хуулиар нэр дэвшигч гадаадын байгууллага, гадаадын хөрөнгө оруулалттай компаниас хандив авахыг хориглодог вэ? Ялгаагүй л төрийн гадаад, дотоод бодлогыг тодорхойлж байгаа парламентад ил байдал нь монгол хүн ч, илрэх санаа нь гадаад улсын эрх ашгийг төлөөлдөг гишүүнтэй болохоос сэргийлж байгаа явдал. 

Э.Болормаа нь Сонгуулийн хуулийг зөрчиж гадаадын хөрөнгө оруулалттай компаниас хандив авсан ч буцаан шилжүүлээгүй нь нийтэд ил байгаа тайлангаас тодорхой болсон. Тайлангаа хийлгүүлсэн хувийн аудитын компани нь ч хууль зөрчсөн нь үнэн болохыг Үндэсний аудитын газарт албан бичгээр мэдэгдсэн байна лээ.

Нэр бүхий иргэдээс "Үндэсний аудитын газрын дарга нь нэр дэвшигч хууль зөрчсөн байхад эрх бүхий байгууллагад мэдэгдэлгүй өнгөрөөсөн нь эрх мэдэл, албан тушаалын байдлаа ашиглаж бусдад давуу байдал үүсгэсэн байна" гэсэн үндэслэлээр гомдол гаргасныг АТГ, хууль бус хандив авч зөрчил гаргасан асуудлыг нь мөн гомдлын дагуу цагдаагийн байгууллага шалгаж байгаа мэдээлэл байна.

Миний хувьд хууль зөрчиж гишүүн болсон учраас УИХ-ын гишүүнээр сонгогдсонд тооцож, үнэмлэх гардуулж, нийтэд зарлан, УИХ, Ерөнхийлөгчид өргөн мэдүүлсэн тогтоолынхоо Э.Болормаад холбогдох хэсгийг хүчингүй болгож, Үндсэн хуульд заасан эх орныхоо тусгаар тогтнолыг батлан хамгаалж, үндэсний аюулгүй байдал, нийгмийн дэг журмыг хангах төрийн үүргээ биелүүлээчээ гэж Сонгуулийн ерөнхий хороонд хандсан. Хариугаа хүлээнэ дээ гэжээ.