Тарваган тахал өвчнөөс урьдчилан сэргийлэх хяналт шалгалт үргэлжилж байна
Нийслэлийн Засаг Даргын 2024 оны “Хүн, малын гоц халдварт болон тарваган тахал өвчнөөс урьдчилан сэргийлэх талаар авч хэрэгжүүлэх зарим арга хэмжээний тухай” А/948 дугаар захирамжийн дагуу холбогдох мэргэжлийн байгууллагууд наймдугаар сарын 15-ны өдрөөс эхлэн авто тээврийн шалган нэвтрүүлэх товчоодод 24 цагаар хяналт шалгалтыг зохион байгуулж байна.
Өчигдөр НОБГ, НЦУГ, ЭЦА, НМЭГ, ЗӨСҮТ-ийн хамтарсан бүрэлдэхүүн авто тээврийн шалган нэвтрүүлэх товчоодод ажиллалаа. Хяналт шалгалтын явцад нийслэл рүү тээвэрлэн оруулах гэж байсан тарваганы мах, түүхий эдийг илрүүлэн мэргэжлийн байгууллагад хүлээлгэн өглөө.
Авто тээврийн шалган нэвтрүүлэх товчоодод хяналт шалгалтын ажлыг эхлүүлснээс хойш давхардсан тоогоор 1400 гаруй алба хаагч үүрэг гүйцэтгэн, нийт 32500 орчим тээврийн хэрэгсэлд үзлэг шалгалт хийж, 54 удаагийн үйлдлээр 200 гаруй ширхэг тарваганы махыг илрүүлэн ЗӨСҮТ-д хүлээлгэн өгсөн.
Нийслэлийн нутаг дэвсгэрт байгалийн голомтот хүн, мал, амьтны гоц халдварт болон тарваган тахал өвчний халдвар тархахаас урьдчилан сэргийлэх хяналт шалгалт үргэлжилж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.