Хонконгчуудын барих 60 тэрбум ам.долларын хотыг яагаад эсэргүүцэв?

1980-аад оноос хойш яригдаж, 2014 онд төслөө танилцуулж, хоёр жилийн өмнөөс хэлэлцэж эхэлсэн далай дунд шинэ хот барих төсөл Хонконгчуудыг хоёр хувааж байна. Хэрэв энэ төсөл хэрэгжвэл Хонконгийн тэнгист нийтдээ 1,700 га талбай бүхий хиймэл арал барьж, 1,1 сая оршин суугчтай урьд өмнө байгаагүй инженерийн асар том бүтээн байгуулалт болох юм.

Гэвч энэ төсөл хэрэгжих эсэх нь тодорхойгүй хэвээр. Шинэ хот Хонконгийн Лантау арлын ойролцоо Зүүн Лантау метрополис нэртэйгээр баригдахад 500 тэрбум хонконг доллар буюу 60 тэрбум ам.доллар зарцуулна. Энэ нь Хонконгийн нийт төсвийн сангийн бараг тэн хагас нь болоод байгаа юм.

Эсэргүүцэгчид юун түрүүнд төсвийн мөнгө бол ард түмнийх, тиймээс ганцхан төсөлд тэн хагасыг нь зарцуулчихаж болохгүй гэсэн байр суурь илэрхийлсэн. Тэд удаа дараа эсэргүүцлийн жагсаал цуглаан зохион байгуулж, гарын үсэг цуглуулж Засгийн газарт өргөн барьсан. Мэдээж хэрэг одоо байгаа эрх баригчид төслийг дэмжсэн байр суурьтай ч сөрөг хүчнийхэн үгүйсгэсээр байна.

Нөгөө талаас байгаль орчныг хамгаалагчид хиймэл арал барихаар төлөвлөж буй тэнгист нэн ховордсон ягаан далайн гахай, цагаан бүргэд нутагладаг учраас эрс эсэргүүцсэн. Түүнчлэн хиймэл хот барьсан ч есдүгээр сард тохиолдсон шиг Манкут далайн хар шуурга дайран өнгөрөхгүй гэх газаргүй гэж үзэж байна. Манкут далайн шуурганы хүч жил ирэх тусам нэмэгдсээр байгаа юм.

Улс төрчдийн төслийг эсэргүүцэж буй өөр нэг шалтгаан бол эх газрын Хятадаас хүн ам ихээр нүүдэллэн ирнэ гэдгээс эмээж байна. Лантау аралд 100,000 орчим иргэн амьдарч байна. Хонконгийн хүн ам 7,3 сая, 25 жилийн дараа 8 сая болон өсч эргээд буурна гэсэн статистик үзүүлэлттэй. Өдөрт 150 хүн эх газрын Хятадаас нүүдэллэн ирсээр байна. Тиймээс сая гаруй оршин суугчийн багтаамжтай  хотод эх газрын Хятадуудад нүүдэллэн ирэх хамгийн тохиромжтой газар болно гэжээ.

Хятадын тусгай бүс Хонконгийн эрх баригчид Зүүн Лантау метрополисыг хүн амын өсөлтөд эергээр нөлөөлөхөөс гадна хэт нягтаршлыг бууруулах сайн талтай гэж үзсэн. Мэдээж хэрэг эдийн засаг, дэд бүтцийн хөгжилийн төлөвлөгөө ирээдүйд өндөр ач холбогдолтой хэмээн санаачилгаа хамгаалж байна.

Эх сурвалж: www.qz.com