40 жилийн өмнө сураггүй болсон эхнэрээ алсан байж болзошгүй
1982 оны нэгдүгээр сард Австралийн Сидней хотоос хоёр бяцхан охины ээж 33 настай Линет Даузон сураггүй алга болжээ. Хотын цагдаа нар түүнийг сураггүй болсноос хойш хайгуулын ажлаа үргэлжлүүлсээр байсан ч хэргийн сэжүүрийг огт гаргаж чадаагүй байв.
Тэгвэл өнгөрсөн 40 орчим жилийн хугацаанд ор сураггүй байсан бүсгүйн нөхөр Крис Даузоныг цагдаа нар өнөөдөр баривчилжээ. Крис Даузон эхнэрээ хөнөөж, цогцосыг нь нуусан байж болзошгүй гэж үзсэн бөгөөд батлан даалтанд суллахгүй, хэргийг нь Шинэ Өмнөд Уэльс мужийн шүүхэд шилжүүлэхээр болов.
Энэ оны дөрөвдүгээр сард Крис эхнэрийнхээ амь насыг бүрэлгэсэн байж болзошгүй гэсэн нотлох баримт цагдаа нар олсон нь хэргийн зангилааг тайлахад тун ойртуулжээ. Цагдаа нар сэжигтнийг баривчилсны дараа гэрт нь нэгжлэг хийж байгаа ч одоогоор эд мөрийн баримт гэх зүйл олоогүй байна.
Энэ жил 70 настай Крис Даузон 1982 онд эхнэрээ алга болох үед регби спортын тамирчин байж байгаад ахлах сургуульд багшилж, 16 настай сурагчтайгаа дотно харилцаанд орсон байж. Кристэй дотно харилцаанд орсон 16 настай сурагч охин Даузоны нялх хоёр охиныг асардаг байжээ.
Линет Даузоны гэр бүлд түүний нөхрийг сэжигтнээр баривчилсан тухай хэлэхэд тэдний сэтгэл санаа арай дээрдсэн гэж цагдаа нар ярьсан байна. Харин Крисийн гэр бүл уг мэдээг хүлээж аваад өмнөөс нь ичиж, зэмлэн буруушааж байгаагаа илэрхийлжээ.
Эх сурвалж: www.cnn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.