Трампын дэлгүүрт зарагдаж байгаа барааны 15 хувь нь "Америкт үйлдвэрлэсэн" байна

 АНУ-ын Ерөнхийлөгч Трамп үндэсний эрх ашгийг нэгдүгээрт тавьж, дотооддоо үйлдвэрлэлээ хөгжүүлж, дотоодын бараа бүтээгдэхүүн хэрэглэхийг уриалсаар ирсэн. Түүний нэрийн онлайн дэлгүүрт 268 төрлийн бараа бүтээгдэхүүн зарж байгаагийн 41 нь л “Америкт үйлдвэрлэв” гэсэн шошготой аж.

Энэ нь Трампын онлайн дэлгүүрт зарагдаж байгаа барааны 15 хувь нь Америкт үйлдвэрлэсэн гэсэн үг юм. Тэгвэл үлдсэн бараа бүтээгдэхүүн хаана үйлдвэрлэгдсэн бэ?

Бусад 227 төрлийн бараа бүтээгдэхүүний шошгоноос хаана үйлдвэрлэгдсэнийг нь мэдэж болох ч бараг боломжгүй. Учир нь үлдсэн бараа бүтээгдэхүүний шошгон дээр үйлдвэрлэсэн газар бичигдээгүй байна.

Ерөнхийлөгчийн онлайн дэлгүүрт зарагдаж байгаа “Америкт үйлдвэрлэв” гэсэн бичигтэй бараа бүтээгдэхүүн дунд Трамп брэндийн хөлбөмбөг 185 ам.доллар, лаванда цэцгийн орцтой ванны давс 25 ам.доллар, Трамп бичгийн цүнх 150 ам.доллар, Трамп гэсэн тамгатай зоосон шоколад 10 ам.долларын үнэтэйгээр багтжээ.

“Набиско” брэнд зарим үйлдвэрээ АНУ-аас нүүлгэж Мексикт нээсний дараа Ерөнхийлөгч тус брэндийн “Oreo” жигнэмгийг дахиж идэхгүй хэмээн мэдэгдэж байжээ.

2016 онд буюу Трампыг сонгогдохоос өмнө “Вашингтон Пост” сонинд түүний худалдаалдаг бараа бүтээгдэхүүнүүд Хятад, Мексик, Энэтхэг, Турк, Герман, Вьетнам, Өмнөд Солонгос зэрэг 12 гадны оронд үйлдвэрлэгдсэн тухай нийтэлж байсан юм.

Эх сурвалж: www.qz.com