УИХ-ын гишүүн Ш.Адьшаа: "Мо Эн Ко" компани Монголын ард түмний өмнө хүлээсэн үүргээ биелүүлдэггүй

УИХ-ын гишүүн Ш.Адьшаа, УИХ-ын гишүүн С.Ганбаатар нар Ховд аймгийн Зэрэг сумын ард иргэдтэй уулзалт хийв. Уулзалтын үеэр иргэд Хөшөөтийн уурхайгаас айл өрхүүдэд олгогддог нүүрсний хэмжээг нэмэгдүүлэх шаардлагатай гэдгийг онцлон хэлж байв.

Иргэд:

-Айл өрхүүд хоёр тонн нүүрсээр өвөлжих ямар ч боломжгүй. Нэг айлд талон олгохдоо 3-4 тонн болгон нэмэгдүүлэх шаардлагатай байна. Өнөөдрийг хүртэл нүүрс авах талон олгогдоогүй байна. 

УИХ-ын гишүүн Ш.Адьшаа:

-Өнөөдөр бид алтан дээр суусан гуйлгачин гэдэг шиг ийм л байдалтай байна Ховдын иргэд Хөшөөтийн уурхайн нүүрсний хогийг авах гэж олон жил царайчилж ирсэн."Мо Эн Ко" компани Монголын ард түмний өмнө хүлээсэн үүргээ биелүүлдэггүй. Засгийн газар, орон нутагтай байгуулсан гэрээгээ нэг ч биелүүлээгүй. Цахилгаан станц угаах, боловсруулах үйлдвэр барина гэсэн ч хэрэгжсэнгүй.

Орон нутаг, хурлын төлөөлөгчид, аймгийн удирдлагуудтай хуйвалдсан “Хөшөөт хөгжил сан” гээд 1 тонн нүүрснээс 1 ам.доллар гээд 7 тэрбум төгрөгийг хувааж иддэг “нүүрсний хулгай” нүүрлэсэн. Тэгэхэд иргэд нь 2 тонны нүүрсний талон авлаа гэж баярлаж байна. Энэ асуудлаар цаашдаа олон асуудлыг хөндөж тавина Хөшөөтийн уурхай ажиллаж эхэлснээс хойш олон Улсын их хурлын гишүүд сонгогдсон ч энэ талаар ярьдаггүй юм байна гэв.