Эцэг эхийн төлөөлөл: Тангаргаа өргөөгүй байгаа дээр хүүхдээ буцааж авч болдог эсэхийг судална

Зэвсэгт хүчний 326-р ангид алба хааж байсан 21 настай цэрэг өчигдөр өглөө амь насаа алдсан харамсалтай хэрэг гарсан. 326-р ангийн хугацаат цэргийн албан хаагчдын ар гэрийнхний хүсэлтээр цэргүүдийг эрүүл мэндийн үзлэг, шинжилгээнд хамруулж байна.

Цэргийн төв эмнэлэгийн эмч: 

-326р ангийн хугацаат цэргийн нийт албан хаагчид шинжилгээ болон үзлэгт хамрагдаж байна. Тодруулбал Засгийн газрын 441 дүгээр тогтоолд заасны дагуу 8 төрлийн шинжилгээг 
нарийн мэргэжлийн 14 эмч хийж байна. Эхний 49 цэргийн хариу хараахан гараагүй байна. Гурван цагийн дараа шинжилгээний хариу гарна.
Эрүүл мэндийн үзлэгт цэргийн анги дээр тогтмол хамрагдаад явдаг. Зэвсэгт хүчний ангиудад ямар нэгэн өвчлөл гарвал Цэргийн төв эмнэлгийн түргэн дууддаг. Лавлагаа шатны эмнэлэгт хандах шаардлагатай бол манай эмнэлэгт хэвтэн эмчлүүлдэг гэв. 

Эцэг эхийн төлөөлөл:

-Хүүгээ харамсалтайгаар нэг гэр бүл алдлаа. Бидний зүгээс бас хүүхдэдээ санаа зовж, хүүхдийнхээ эрүүл мэнд бүрэн бүтэн байдлыг шалгуулах гээд энд ирээд байна. Одоо гуравдугаар давхарт шинжилгээнд орж байгаа гэсэн. Манай хүү Их засаг их сургуулийн нэгдүгээр курсийн оюутан. Цэрэг татлагын комисст сургуулийн бичгээ үзүүлсэн ч тоож үзээгүй шууд цэрэгт татагдсан.

-Одоо тангаргаа өргөөгүй байгаа дээр хүүхдээ буцааж авч болдог эсэхийг судалж үзнэ. Ээж хүний хувьд үнэхээр айдастай байна. Энэ ангийг судалж үзсэн. Удаа дараалан ийм асуудал гарч байсан гэдэг мэдээллийг харж үзсэн.

-Бүх л хүмүүс сэтгэл нь зовж шаналаад энд ирсэн. Өдий том болсон хүүгээ цэрэгт мордуулчихаад алдсан эцэг эхийн сэтгэл ямар байгаа нь үнэхээр ойлгомжтой. Маш их харамсалтай байна гэв.