МИАТ ТӨХК болон AerCap компаниуд 2023 оны тавдугаар сард хоёр ширхэг 787-9 /Dreamliner/ төрлийн агаарын хөлгийг үйл ажиллагааны урт хугацааны түрээсээр авах гэрээ байгуулсан. Гэрээний дагуу эхний 787-9 агаарын хөлөг өнөөдөр “Чингис Хаан” олон улсын нисэх буудалд газарджээ.

Боинг-787-9 онгоцны их биеийн 50% нь композит материал буюу бал чулуун нийлэг материал тул илүү хөнгөн болж нислэгийн алслалт нэмэгдэнэ. Мөн 15000 км буухгүй шууд нисэхээс гадна Улаанбаатараас Ази, Европ, Австрали, Хойд Америкийн аль ч хот руу нисэх боломжтой.
Боинг-787-9 онгоц нь 292 хүний суудалтай, дэлхийн хамгийн том цонхтой зорчигчийн онгоц юм. Мөн шатахуун зарцуулалт бусад том оврын онгоцноос 20% бага аж.

Боинг-787-9 эхний ээлжид Сөүл, Франкфурт, Стамбул чиглэлд, ирэх оны эхний хагаст багтан АНУ руу шууд нислэг үйлдэнэ.

---