Малчид нэгдэн ногоон тэжээл тарьж, өвлийн бэлтгэлээ хангаж байна

Өвөрхангай аймгийн Хархорин сумын малчид өвөл, хаврыг хүндрэл, эрсдэл багатай даван туулах зорилгоор нэгдсэн зохион байгуулалтад орж ажиллаж байна.

Анх 2020 онд сумын иргэдийн хурлаар 220 га талбайд ногоон тэжээл тариалах шийдвэр гаргаж, 5 баг тус бүр 50 га-д тарьж эхэлжээ. Үүний үр дүнд өнгөрсөн жил 1 га-гаас 140 боодол өвс хураан авсан бөгөөд Шанх багийнхан гэхэд хамгийн үлгэр жишээ ажиллаж, өвс тэжээл хомсдолтой, үнэ өндөр байх үед хямд үнээр базаах боломжийг бүрдүүлжээ.

Цаашид сумын зүгээс баг тус бүрд 300 га талбай, малын хөлийн татвараар хашаа барих материалыг шийдвэрлэж өгөх бол малчид нэгдэн өөрсдөө тэжээлээ тарих, хашаагаа барих зохион байгуулалт хийж байгааг Хархорин сумын Засаг дарга Г.Одгэрэл хэллээ.