S'outlets дэлгүүрийн газрыг чөлөөлж, Aqua Garden хорооллын газрыг усны нөөц бүрдүүлэх зориулалтаар чөлөөлөх ёстой гэсэн дүгнэлт гарчээ

Нийслэлийн Засаг дарга бөгөөд Улаанбаатар хотын захирагч Д.Сумъяабазар усны барилга, байгууламжийн мэргэжлийн байгууллагууд, инженерүүдтэй уулзжээ. 

Энэ үеэр мэргэжилтнүүд цаашид ямар арга хэмжээ авах ёстой талаарх судалгаагаа танилцуулсан байна. Судалгаанд Сэлбэ болон Дунд гол дагуу 29 байршилд зайлшгүй газар чөлөөлөх шаардлагатай гэж зөвлөж байна.

Тодруулбал S'outlets дэлгүүрийн газрыг чөлөөлж, Aqua Garden хорооллын газрыг усны нөөц бүрдүүлэх зориулалтаар чөлөөлөх ёстой гэсэн дүгнэлт гарсныг Престиж инженеринг ХХК-ийн гүйцэтгэх захирал Ш.Ганзориг танилцуулжээ.

Тиймээс Сэлбэ, Дунд голын урсацад нөлөөлөхүйц барилга барьсан дээрх газруудыг нураах эрхзүйн орчныг судалж эхэлсэн байна. Цаашид энэ талаар Засгийн газарт танилцуулж, шийдвэртэй арга хэмжээ авах талаар Нийслэлийн засаг дарга Д.Сумъяабазар мэдэгдлээ.

Сэлбэ голын голдиролд байгаа S'outlets дэлгүүрийн барилгын газрыг анх 2002 онд олгосон байна.

Үүний дараа Сүхбаатар дүүргийн Засаг дарга Д.Энхбаярын захирамжаар 2002 онд олгож байжээ.
Үүнээс хойш Нийслэлийн Засаг дарга М.Энхболд 2004 онд 288м2, Нийслэлийн Засаг дарга Г.Мөнхбаяр 2009 онд 1665 м2 хэмжээтэй болгож, 2015 онд Нийслэлийн Засаг даргын орлогч Н.Батаагийн гарын үсэгтэй захирамжаар 2409 м2 болгож талбай хэмжээг тус тус томруулж, эзэмших хугацааг сунгасан байдаг байна.

Мөн тус барилга нь анх 2014 онд түр барилгын зориулалтаар албан даалгавраа авсан ч зориулалтын дагуу баригдаагүй байгууламж аж.