?LIVE: Гацуурт ХХК-ийн үүсгэн байгуулагч Л.Чинбатын хэргийг прокурор шалгаж байна

Эрүүгийн цагдаагийн алба, Мөрдөн байцаах албанаас сүүлийн үед гарсан зарим хэргийн талаар мэдээлэл өгөв.

ЦЕГ-ын Мөрдөн байцаах албаны дарга, цагдаагийн хурандаа Н.Мишигдорж:

-Баянгол дүүргийн 14 дүгээр хороо, "Ачлал" их дэлгүүрийн зүүн талд "Ц" гэгч нь тээврийн хэрэгсэл ачих асуудлаас үүссэн маргааны улмаас гудамж, талбайд хутга гаргаж танхайрсан хэрэг цагдаагийн байгууллагад бүртгэгдсэн. Уг үйлдлийг гомдол, мэдээллийн дагуу зөрчлийн хэрэг нээгээд, шалгалтын ажиллагаа үргэлжилж байна. 

-Гандантэгчэнлин хийдэд шавилан сууж байгаа бага насны хүүхдүүд хохирсон, холбогдсон гэх хэргийн талаар товч мэдээлэл өгье. 2023 оны зургаадугаар сарын 16-нд энэ мэдээлэл анх мэдээлэгдсэн. Үүний дагуу Баянгол дүүргийн цагдаагийн нэгдүгээр хэлтсээс мөрдөн шалгах ажиллагаа явуулсан.

2023 оны зургаадугаар сарын 23-нд УЕП-ын тушаалаар баталсан харьяалал тогтоох журмын дагуу Мөрдөн байцаах албаны хүүхдийн эсрэг гэмт хэрэг мөрдөн шалгах хэлтэст мөрдөн шалгах ажиллагаа явагдаж байна. Эрүүгийн хуулийн тусгай ангийн 12.1.4-т зааснаар хэрэг бүртгэлтийн хэрэг нээн шалгаж байгаа. Албаны даргын тушаалаар мөрдөгчийн ажлын хэсэг гарган ажиллаж байна. Мөн нэмж хэлэхэд 14 хүрээгүй хүүхдийг бага насны хүүхэд гэж ойлгодог. Хүүхдийн эрх, аюулгүй байдал, нэр хүнд, мөрдөн байцаах ажиллагааны нууцлал зэргийг харгалзан хүүхдийн эрхийг хүндэтгэхийг хүсэж байна. Мөрдөн шалгах ажиллагаа явагдаж байна. Шүүхээр эцэслэн шийдвэрлэгдээгүй асуудалд ёс зүйтэй хандах хэрэгтэйг анхаарах шаардлагатай байна.

-“Гацуурт” ХХК-ийг үүсгэн байгуулагч, Хөдөлмөрийн баатар Л.Чинбат Сэлэнгэ аймгийн Зүүнбүрэн сумын II багийн нутагт иргэд, малчдыг жолоодож явсан “Ланд круйзер” загварын автомашинаараа дайрч гэмтээсэн үйлдэл гаргасан. Сэлэнгэ аймгийн цагдаагийн газраас иргэн Л.Чинбатад холбогдох үйлдлийг шалгаад "Яллагдагчаар татах" саналыг тус аймгийн прокурорын газарт 06-сарын 26-ны өдөр хүргүүлсэн. Тус саналыг ажлын гурван өдөрт багтаан шийдвэрлэх хуультай. Одоо прокурорын шатанд байгаа гэж ойлгож болно гэв.