Ховд аймгийн Ховд сумын Улаан бураа багийн “Улаан бураан адаг” хэмээх газарт янгир ямаа усгүйдэж байна.

Иймээс Ховд сумын ЗДТГ, тус аймгийн Онцгой байдлын газартай хамтран зэрлэг амьтдыг хамгаалах зорилгоор хөв цөөрөм байгуулан долоог тонн ус хийж дүүргэлээ.

Энэ нутагт одоогоор цас ороогүй байгаа учраас зэрлэг амьтад усаар гачигдаж байгаа бөгөөд өнгөрсөн жил өдийд мөн хөв цөөрөм байгуулах арга хэмжээг Ховд аймгийн Онцгой байдлын газартай хамтран хэрэгжүүлж байсан.    

“Улаан бураан адаг” гэх газрын ойролцоох ууланд 100 гаруй янгир ямаа байршиж байна 

Энд  хатуу хучилттай авто зам тавих явцад зэрлэг амьтад Буянт гол руу нэвтрэх, гарах гарц гаргаагүй учраас ийнхүү зэрлэг амьтны амьдралд сөрөг нөлөө үзүүлж байна гэж Ховд аймгийн Байгаль орчин, аялал жуулчлалын газраас мэдээллээ.

Цас орох хүртэл Ховд сумын ЗДТГ, байгаль орчны салбарын холбогдох байгууллагууд хамтран энэ газарт янгир ямаа тогтмол услах үйл ажиллагаа хэрэгжүүлэхээр төлөвлөжээ.

Авто зам барьснаар янгир ямааны ус уух боломж сүүлийн 2-3 жилийн хугацаанд хумигдсан тул янгирын сүргийг ус уух боломжоор хангаж, биотехникийн арга хэмжээ авах болжээ.

 Эх сурвалж: Монцамэ

---